U montri rangbah ka Meghalaya u Conrad Sangma ynne ka sngi hapoh ka dorbar chna aiñ ka jylla da pyntip u wa da em ki thaw wa yei kær pood waka Bangladesh da leh nadooh u Zero Line.
“Da em ki bynta wa ya u pood da pynyieñ nadooh u Zero Line wei kini toh kiwa boon wa em hapoh ri-loom Jaiñtia,” da ong u ya ini deiwa jubab ya kiwa boon ki phang kylli wa da pynhær da u MLA khlem seiñ u Syntar Klas Sunn heipor ka kynta kylli ka dorbar.
U Conrad da pyntip u wa i kær pood na u Zero Line da ye u leh ha ki kattu katni ki khappood ka India- Bangladesh hadien wa yaklam wei ya sñiawthooh hapyrdi u Prime Minister Narendra Modi waka Prime Minister Shiekh Hasina.
“Hadien wa da ya soi hapyrdi ki ar ri, ka Meghalaya da yoh ko 1.43 Km deiwa ya e kylliang yaki thaw,” da pyntip u Conrad.
Chooh chooh da pyntip u wa da ini i ya e kylliang ya i thaw, ka Pyrdiwah wa kiwi ki thaw wa da poi cha i yaleh ki chipai hapyrdi ka India wa Bangladesh da haap noh ki cha u pood ka India.
U Conrad da pyntip u wa i kreh wow kærpood toh kawa dang lai chakhmat uwa jrong 444.857 Km hapyrdi ka Meghalaya wa Bangladesh. Wei na ini, 329.160 Km toh iwa da dep, wei 46.970 km toh kiwa dang kreh.
Da pyntip u leh wa da em 12.318 Km i wym ye wow kær wei 60.533 Km won wa ym em kær. U Conrad da ong u wa i pyrchah ki kattu katni ki NGO da pynsangeh ko leh yei kreh wow kær pood ha kiwa boon ki thaw.
Da yooluti u wa manda dep u leh yaka sorjamin wa khaddooh boon kiyi kiyi wa thut daw ye u pynbait ki khaddooh.
Discussion about this post