Ki seiñbhalang wa kynthup ya ka Khasi Students’ Union (KSU), ka Hynniewtrep Youth Council (HYC) wa ka Hynniewtrep Integrated Territorial Organization (HITO), da yang ki khrui ha lait ka Umroi Airport yow pyrchah yei thmu yong u heh ka seiñ ki Hindu, u Shankaracharya Avimukteshwarandah wow wan ynne ka sngi.
Hadien wa yang nadooh 11:00 waje i step hadooh 1:00 waje i sngi, da tip wym wan de u myntu wei ye u wan mynstep won.
U President ka HYC, u Roykupar Synrem da ong u wa ka seiñ ym em laad ko wow wan yooh kjat u næ ka seiñ u kiwa da thmu wow pynbna ya ka masi kam ka bei ka ri wei wow khang yei choh doh masi kamjooh wow baam doh masi.
Da ong u leh wa ka seiñ daw lai bood ko cheiwon cheiwon ki thaw wa thmu ki wow lai ha Meghalaya wei u beh ki leh wei ym chah leh wow batai ya iwa baam wa dih ka jaitbru.
Neiliang won u General Secretary ka KSU Nort Khasi Hills, u James Mawphniang da ong u wa ka seiñ ym e laad ko wow wan tuklar ki bru na baar yei baam i dih, ka riam ka bait wa ka kup ka sem yong ka jaitbru. Da ong u wa lada wan u na suiñ næ na khyndaw wot na um leh, ka seiñ u pyrchah bait ko.
U General Secretary ka HITO Shillong City, u Balajied Jyrwa da ong u wa ka HITO daw wan biang ko mynstep cha kani ka Airport neibhah katkam wa tip ki, ye u wow wan mynstep uni u heh kani ka seiñ wa kwah u khang baam doh masi.
Da ong u wa ka seiñ ym e laad ko ya ki bru kiwa wanrah yei rukom wym yahaap wow pynbna ya ka masi kam ka bei wei wow khang baam doh.
Kini kiwa yahkhmat seiñbhalang da yaklam ki leh wa u Magistrate, uwa da pyntip wa uni u bru ym wan u myntu ka sngi wei daw wan won u mynstep.
Ki seiñbhalang da ong ki wow ong ya oo wym toh u hiar u na ka lieñsuiñ tangwa wow phah liwan oo lada wan u.
Discussion about this post