Ki san ngut ki bru da dooh ki yei mynsien wei boon ngut kiwa da mynsoo wei dang wiar hadien iwi i yung wa em boon mala da haap i iwa man leh kam i yung wa sah kiwa dang lai puræ (Paying Guest Building) iwa em ha Southwest Delhi ha ka thaaiñ Satya Niketan iwa da jia ynne ka sngi.
Ini i thaw wa em ini i yung toh iwa khynnia bha hajan ka South Campus ka Delhi University South wei da antaad wa kiwa dang wiar da em da ki dorjon ngut wei i yaleh wow thooh ki dang pteiñ i hadooh kattæ.
Ini i yung toh iwa da 40-50 snem wei da antaad kiwa chah ban da em ki 30-40 ngut wei da haap i heipor kamwa 1:30 i sngi heipor wa dang em i pynkreh ha tyngkong (Basement) kani ka yung.
Neiliang ka Chief Minister ka Delhi, ka Rekha Gupta da lai ko leh cha ka AIIMS Trauma Centre yow pait ya kiwa mynsoo kamjooh cha kani ka thaw wa jia deiwa ong wa ym e laad ya kitu kiwa emkti.
Neiliang ki pulit da tipmit ki ya u tre ini i yung uwa tip kam u Anand Bansal uwa na Gurugram wei da booh FIR pyrchah ya oo.
Kani ka thaw wa jia toh kawa em boon ki PG, ki Hostel, ki thaw baam ya kiwa dang lai puræ wei ha kini ki sngi wa dep ka Delhi da yoh ko wow maad u slap wa joor nadooh ka 4 tarik.
Kani ka yung wa haap toh kawa tip kam ka “Hostel Daze” kawa em 15 tylli ki kamra deiwa sahlang 2-3 ngut kiwa lai puræ ha chi kamra wei ha ka mala wa em ha tre toh kawa booh leh ki dukan. Da ye leh wow pynlait im ya 11 ngut.
Kiwa sah ha kani kiwa boon toh na Keralam, Haryana wa Uttar Pradesh kiwa lai puræ ha Motilal Nehru College, ha Atma Ram Sanatan Dharm College wa Sri Venkateswara College.
Discussion about this post