U MLA warim ka Congress uwa jooh man teiñ leh kam u Montri ka jylla, u R.G. Lyngdoh da pynkhreh u wow mih biang cha ki kaam saiñhima deiwa psiah biang cha ka Congress, wei da kyrmen u wa daw em biang i tylli ha ka Party hapoh i yahkhmat u President wa thymme, u Vincent H Pala.
Hawa yaklam wa kiwa pathai khubor, u Lyngdoh da ong u wa ya ini i rai da chim u hadien wa em boon ngut ki bru waheh wa ki khynroo kiwa da lai kyrpaad ya oo wow mih chakhmat hadien wa da yoo ki yei man i long ha ka jylla, khamtam nei wym sñiaw chngaaiñ de ki ya ka mynried wei kamjooh leh i khut u President wa thymme ka MPCC ya oo.
Da ong u wa em kyrmen u ha ka Congress wei ym du i psiah biang u cha ka Party tangwa daw yarap u leh ya ka wow wanrah ya i kylla khamtam hapoh i yahkhmat u President wa thymme uwa em ka thong wow krehlang kawa man ka nuksa wa bha ya ka Party.
Hawa kylli, u MLA warim da ong u wa samen ymye u wow wanrah yei kylla tangwa i krehlang daw ye wow leh ya kiwa boon ki kaam deiwa pynrap leh wa emkaam wa ki paidbah u yoo ki ya ka mynried kawa bha lada kyrchaan ki ya ka Congress. Chooh chooh da ong u wa emkaam wow tip yei thrang wei angnood ki khynroo khyllood wa ki warep kamjooh leh kiwa seiñ khih deiwa wanrah ya i kylla ha i rukom krehkaam ka Party.
U RG Lyngdoh da ong u leh wa emkaam wow chimkhia ya i yoh i laa ha ki thaw palatsor, wow pynduna ya i wan tooid ki bru na ki thaw palatsor cha sor, neibhah wa mih i eh katni toh nei wan tooid ki palatsor cha sor.
Kam wow kdaw heini, u Lyngdoh da uiñ biang u cha ki kaam saiñpyrthai ha ka jylla toh hadien 13 snem hadien wa da jop u ar sien kam u MLA ka Congress na Laitumkhrah, ha u snem 1998 wa u 2003.
