U Montri Rangbah ka jylla, u Conrad K Sangma da ong u wa ka sorkar daw pyntikna ko wa i thmu wow pynman ya ka jylla Meghalaya kam ka thaw rep dieñ Satlai ymtoh u ktah ko ya ka rymaw næ ktah ya i myntoi ki paidbah ka jylla.
Da ong u wa i thmu ka sorkar India toh iwa bha tangwa neiliang ka sorkar jylla hap pyrkhat ko liang wanang wa ym em i chah ktah ki khloo wei da ong u wa lada ki thaw toh ha kiwa sah-chrah wei kiwa ym ktah ye i wow pynmyntoi ya ki paidbah.
Kam wow kdaw heini, hadien wa ka sorkar India da pynbna ko ya i thmu wow pynman ya ka jylla kam ka thaw rep ya ki dieñ Satlai wow pynmih phniang ‘Palm Oil’ da mih chiboon i pyrchah na ki bru kiwa yada ya ka rymaw wa ki seiñ kreh monsñiawbha neibhah i rep ya kini ki dieñ ha ka jylla daw ktah i ya ka rymaw wa ki mrad wa im ha ka.
Neiliang ka MP ka Tura, ka Agatha Sangma leh da dep ko wow thoh cha u Montri Rangbahdooh ka ri, u Narendra Modi wow pyrchah yeini.
