Jowai: Ka Hima Mylliem ynne ka sngi da pynman biang ko ya ka Dorbar Hima hadien 18 snem ya kawa da pynman ha madan Dalang, Polo, Shillong.
Ha kani ka dorbar da emlang leh ki MDC ka KHADC heiwa da pynlai ya ka dorbar u Paiem Ainam Manik Syiem, ki montri, ki wasan ki syiem raid, ki sordar ki rangbah shnong wa ki paidbah, tangwa i wanpoi ki khon ka Hima ym em man i kamwa da yooluti hadooh wa da haap chim ya ka rai wow pynman ya ka man la u snem wei ym pynman de ya ka ha Shillong.
Ya kani ka dorbar da pynchongchit da ki rwai wa ki chaad tynre na ki chnong wa ki raij wa haap hapohbka Hima Mylliem.
U CEM ka KHADC u Hispreaching Son Shylla da ong u wa ka dorbar hima man ko wow pynim biang ya ki dustur u Khasi wei da sñiaw kmen u wa man ko ka sngi wow sah kynmoo neibhah wa da pynman ya ka hadien 18 snem.
U CEM da ong u wa hanlada ka sngi man ko kawa kmen tangwa i rai ka Supreme Court wow pyndam noh ya ka Section 377 ka IPC kawa kheiñ pyrchah aiñ yei chongkha para chynrang namo para kynthai da pyndoom yumut neibhah wa ki Khasi ym em kam kani ka dustur.
U CEM da ong u wa emkaam ya waroh ki hima khamtam kiwa haap hapoh i pait ka KHADC wow khut dorbar chisien chi snem wei lada ymye u leh kamtæ u Syiem daw chah knieh noh ka khet wei kani da kdaw che leh ha ka aiñ ki hima.
Chooh chooh da ong u wa kam kiwa synchaar kam ki dorbar shnong, ki raid wa ki Hima em ki jar jiar ka bynta wow pynlait ya ki kaam wa sih ha ka imlang sahlang, da kyntu u leh ya kiwa yahkhmat ki chnong wa ki Hima wow chim ki laad ki luti wow pyndooh jait ya i chah thombor ki kynthai wa ki khynnah wei wow pyndooh leh yei roi u drugs uwa da pynsihdur ya ka imlang sahlang wa ka jaitbru waroh kawi.
Ha iwi i liang u CEM da beiñ u ya ki paidbah kiwa sah hapoh u pood u ang ka hima khamtam kiwa hapoh ka sor Shillong kiwa ym em wan cha kani ka dorbar hima.
“Nadooh u snem wow wan ya ka dorbar Hima ym pynman de ha Shillong neibhah ki paidbah ym kwah ki wow pynneh ya ki riti dustur u warim,” da ong u Shylla.
Discussion about this post