Hadien 8 bnai yoh ki pulit u pyllait ya ka Lammidaka Rymbai na kiwa rahbor ka

Shillong: I krehchitom ki pulit ka East Khasi Hills District wow thooh ya kawi ka bru kawa tip kam ka Lammidaka Rymbai kawa em 24 snem i rta da man i iwa jop heiwa da yoh u pyllait ya ka na Khalpara Siliguri.

Ka Lammidaka toh kawa na Ialong wei kawa kreh chipor (Internship) kam ka nurse ha GNRC Hospital Guwahati, da sah ko ha iwi i Paying Guest wa em ha Super Market iwa jngai kamwa 50 meter hi-eh na kani ka thaw sumaar, da wiar ko nadooh ka 2 Thohlakhmi (February) uni u snem khlem em wa tip heiwon em ko.

Ha ka 21 Thohlakhmi ka bei yong ka, ka Jemina Rymbai da ujor ko hei yatoh wa i wiar ka khon ko ha Dispur Police Station wei hadien ini da ujor won ko sa ha Lumdiengjri ha ka 26 tarik u jooh u bnai.

Neiliang ka Missing Squad ka East Khasi Hills District Police da booddien ki ya ini i kaam din-pa-din top-pa-top hanlada wiar ko na Guwahati wei hadien ini da kem ya u Nur Muhammad uwa na ka chnong Sonatary wa hap hapoh ka Tarabari Police Station Barpeta dei yarap ki pulit ka Boko Police Station heiwa da chem wa emkti u ha ini i kaam.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U Nur toh uwa khaddooh dooh wow yachem wa ka Lammidaka wei da chem na oo ya ki tiar yong ka wei da kam u wa da ieh u ka ha Hajo hadien wa palat ki ya ka yingkieñ Saraighat Bridge.

Hadien ini ki pulit ka Guwahati City Police da register ki da ka case Basistha PS Case No. 260(04)2017 u/s 366/376 IPC wei da kem noh ki ya u Nur.

Neiliang ki pulit da chemdien ki wa ka Lammidaka da chah rahbor ko cha West Bengal wei ki pulit ka Missing Squad wa ka Anti Human Trafficking Unit, East Khasi Hills hadien won da yoh yutip ki wa da chah rahbor ko cha Siliguri, kamtæ ha kani ka 22 tarik uni u bnai da lai ki cha Siliguri chirup wa ki pulit ka Assam.

Dei krehlang ki pulit da ye u pyllait ya ka Lamidaka Rymbai na iwi i yung wa chah kset ko wei da yoh biang ko u emlang wa kiwa hayung ko hadien 8 bnai kattu.

Kiwa emkti hei wow rahbor ya ka da yoh ki u yut wei dang yaleh ki pulit wow thooh ya ki hadooh katni kamjooh leh wow tipmit  ki.

Also Read: Kheiñstiñ ki pulit Assam yei wow thooh yaka Lammidaka: Vikek Syiem