theme-sticky-logo-alt
theme-logo-alt
Advertisement ad1

Hadien ar snem yoh biang u pyndep ya ka lehniam Behdieñkhlam ka Raij Tuber

Advertisement ad1

Haawa yaklam wa u President a Seiñ Raij Tuber, u R. Harvis Phawa chirup wa u General Secretary, u Jolby Sana da pyntip ki wa ka Behdieñkhlam yong ka Raij Tuber myntu u snem u sdang ko nadooh ka 19 tarik hadooh 22 tarik uni u bnai khlem em i won i won i kdoh kyndon ya ki paidbah waboon walang wow chimbynta ha ka kani ka Behdieñkhlam.

Ka Behdieñkhlam toh ka lehniam yong ki jaitbru Pnar ha Ri-loom Jaiñtia kawa jooh leh chisien chi snem hadien wada dep ki khon ka Raij u thung ya u kba ha hali ha pynthor.

Ka Behdieñkhlam toh lehniam kawa lai lang chirup i chaad i kmen, i kñia i khriam, i ngooh i dem, i suit i choor wa yahkhmat da u Langdoh, ka Langdoh deilang ki Wasan Raij kiwa kynthup ya u Sangot, Maji, Chutia, Dhulia, Kitkhoh ar ngut ki Tymmen ki San (Tymmen Raij).

I bynta wa kyrpang yong ka Behdieñkhlam toh yow e ngooh e dem ya u Trekirot wabooh wathoo wow beh u yaka khlam ka chitom ka sih ka roi, ka yachoon bichni, ka baamtooh napoh ka imlang sahlang ka chnong ka Raij cha wasoo wasep ka sngi u bnai. Yow yoh won dei kyrkhu kyrdoh hei chait hei tram la hei mankhih mankhan, yow man bha man miat u kba u khoo i thung i tep yow dap snem snem dap bnai ki khon ki paaid.

I pynkhreh ya ka lehniam Behdieñkhlam ha waroh ki Seiñ Raij Chnong ki dong ki chnat da man ko kawa chongchit ha ryngkat I thai ki sur wabang wathiang ki bom, ki bhuri, ki bakur ha ki chnong ki thaw deilang i ka-it ka-sar, i kynhoi da kyndeh ko ya u dohnood ki waboon walang wa da poi i samoi i chaad i kmen chisien chisnem u pyndep ya ka niam hajrong ka ktieh ka biar.

Ka Behdieñkhlam yong ka Raij Tuber toh kawa heh tam hapoh Ri-loom Jaiñtia kamjooh hapoh ka bri u Ynñiaw Trep Ynñiaw Wasa kawa em hadooh 29 tylli ki Seiñ Raij Chnong wei hapoh kini ki 29 tylli ki Seiñ Raij Chnong namo ki Chnong em ki hadooh 64 tylli ki Dong kiwa yachim bynta u chna rong. Na ki 29 tylli ki Chnong kiwa hap hapoh ka Raij Tuber, 11 tylli toh kiwa hap cha West Jaiñtia, katwa 18 tylli ki chnong cha East Jaiñtia.

Ka Behdeiñkhlam sdang ko nadooh ka sngi Pynsiñ heiwa ka Phang Wah da ku ki cha Phang Neiñ deilang i chaad i kmen, katwa haka sngi wa bood (ka sngi Mulong) ki Phang Ñeiñ daw hiar won ki cha ka Phang Wah kam ka dak i yaburom markylliang ryngkat i ngooh i dem.

Haka sngi wa le, toh Musiang dang step nadooh 5:00 waje u Langdoh deilang ki Wasan Raij u pyndep ki ya ka Kñia Syiem Ryngkaw ha Mukoi Ryngkaw. Hadien wa dep Kñia bood sa ka ka Rah Bhang wei Chooh Thyndai. Yaka Chooh Thyndai hap pyndep chynnam chwa wow Beh Khlam u Langdoh waki Wasan Raij.

Haka sngi wa soo kawa man ka sngi wa khaddooh yong ka Behdieñkhlam katæ toh ka sngi Muchai dang step heipor 5:00 waje u Chutia won u pyndep u yaka Niam Kñia Beh Khlam. 11:00 waje i step won u Langdoh wa ki Wasan u sdang ki wow E Klong Pyrnah cha ki Dong wa chna Rong na ki Seiñ Raij Chnong waphær waphær. Bood sa ka Niam Yabooh wei Yataan Bhang, hadien neitæ poi cha i noh ya ki Rong ki Rup. U pynkut ya ka niam daka Yaslait Niam haphyrdi u Rangkynsai ka Phang Wah pyrchah ya u Rangkynsai ka Phang Neiñ.

Hei pyrtuid ka Bei Seiñ Raij Tuber, dei mynsien wa sñiaw kmen wei maya khut sñiawbha ko ya phi ki lok ki jor, ki kur ki kha najan wa najngai hapoh ka bri u Ynñiaw Trep Ynñiaw Wasa wow wan sakhi lang cha ka lehniam Behdieñkhlam yong ka Raij kam ka dak i ya burom markylliang khlem da kheiñ ya ki khian ki heh ka niam ka rukom.

Da khut leh khamtam ya ki MDC yong ka JHADC waroh kiwa man kam kiwa ksoh ya ka khyndaw ka chyiap ka Riti Dustur yong ka jaitbru.

Behdieñkhlam wasuk wakmen ya phi waroh,

U Trekirot wow e dei kyrkhu kyrdoh.

Advertisement ad1
Share this:
Previous

Yoh 1st Runners Up u khynroo na Jowai ha ka Mr. Iconic Face Of Northeast 2022

Next

Lai bait i jied President ka ri ha Meghalaya