15 49.0138 8.38624 1 0 4000 1 https://wyrta.com 300 0

Hadien boon snem wa kwah u Kiren Rijiju wow wan cha Nartiang, ynne ka sngi da man i iwa sakhiat
Wan sakhi u Kiren Rijiju ya ka lehniam Puja ha Nartiang ynne ka sngi

0 Comments
Advertisement ad1

Jowai: U Kiren Rijiju, Union Minister of State for Home Affairs ynne ka sngi da wan sakhi u ya i pyndep ya ka lehniam Durga Puja ha Nartiang ka sngi nohblai tangwa da poi slem u hadien wa ym ye ka Helicopter u mih na Guwahati neidaw wa joor u slap, kamtæ da pyntip u wow lai cha khmat ya ka yalang wei oo daw pyrchang u wan da ka kari.

Ha chwa wow kut ka yalang heiwa u Vincent H Pala da man u kam u kongsan da pyntip wa daw wan bait u Rijiju da ka kari wei ki paidbah da chong yang ki katwa ka lehniam lai bait ko cha khmat.

Advertisement ad1

Hadien wa poi ha Nartiang da lai u nyngkong cha ka Mandir ka Maa Jayantee yow yoh yei kyrkhu na ka.

Hei klam yong oo da pyntip u leh wa da slem kwah u wan cha Nartiang wei da dep wan u cha ri-loom Jaiñtia nachwa tangwa ym jooh yohlaad u poi cha Nartiang kamtæ ynne ong u wa man ka kabu ksiar wei lada joor u slap leh toh u poi bait u cha Nartiang yow lait u silet.

Da ong u wa ka chnong Nartiang toh kawa biang i yurim yong ka neibhah ka dustur riti, kiwa tei ki warim dang neh bait ki hadooh katni wei kamtæ man ko ka chnong wa mahajon wei ye u ong leh ha waroh ka ri India.

Chooh chooh da ong u wa yoosuk u wa ka chnong man ko kawa miat wa khooid wei neilaing yong oo da kular u wa lyngba ka tnat Tourism waka Tourism daw thooh laad u wow pynpawnaam chooh ya kani ka thaw wow tipmit ka pyrthai ka.

Da kular u leh wa daw poi biang u cha kani ka thaw.

Ka Nartiang da man kam iwi na i thaw wa kyntang ha i ngait niam Hindu wa man ko kam kawi na ki Shakti Peetha kiwa em 52 tylli waroh heiwa da em ki ha ri India, Nepal, Bangladesh, Tibet, Sri Lanka wa ha Pakistan.

Katkam i ngait Hindu u Shiva hadien wa yap ka Sati da rah u ki i metyap yong ka kylleiñ kylleiñ ka pyrthai wei da ah u yei metyap yong ka 52 lyngkhot wei ka skep tidiang yong ka da haap ko cha pyrthai heiwa da haap i ha Nartiang kamtæ da man ko kawi na ki thaw wa kyntang ya ki Hindu.

Ya ka Mandir ha Nartiang da e pyrtuid kam ka Maa Jayantee ka blai wa mane ki wei da tip leh ya ka kam ka Jayanti Devi heiwa sa kawi ka mandir kam kani da em ko ha Bangladesh ha i thaw wa em ka hima ki syiem Jaiñtia wei ye u man leh wa mih itæ i ktein Jaiñtia toh wa mane ki ya ka Jayanti Devi.

Ynne ka sngi da em leh u MLA ka thaiñ u Sniawbhalang Dhar, u CEM wa thymme ka JHADC u A.A. Shullai, ki MDC wa kiwi kiwi.

Advertisement ad1

0 Comments

Leave a Reply