Ha ka tayaw wa dadep da sakhi wa i bynta yong u sarok ha Iawmusiang, Jowai hajan i yung krehkaam u Deputy Commissioner da che biang i hadien boon tylli ki snem nadooh wa plæh ki Bulb ha u chrot-bah namo u High Mast Lighting Pole da ki boon tylli ki snem wa em hapoh pchem kani ka yung krehkaam u DC.
Hawa yaklam wa u Deputy Commissioner ka West Jaiñtia Hills, u Garod LSN Dykes da pyntip u wa em ar tylli ki Project wa da pynkreh da ki karkhana pynmih khyndawbilat hapoh Jowai heiwa kawi na ki toh ka yingkieñ wa pynyabi ya ka St. Mary Mazzarello HS School wa ka Marian Hills HS School wa kawi won ka Project toh i pynche bordiñ ya ka Iawmusiang.
Da pyntip u wa ha u snem wa dadep ka Synjuk Waheh Chnong Jowai, da yachem ko ya oo heiyatoh wow sliah noh ya ka yingkieñ kawa da synjor wei da booh ko hei maa ya ki paidbah.
Chooh chooh da pyntip u wa neiliang u Waheh Chnong ka Tympang Iawmusiang leh da yachem u wa DC heiyatoh wa uni u chrot-bah wa da yap da boon tylli ki snem.
U Garod da pyntip u wa da chimkhia yeini heiwa ya ka yingkieñ da phah wow sliah ya ka katwa ya u chrot-bah da chimkhia da ki karkhana khyndawbilat wa em ha East Jaiñtia wow pynche biang ya ki heiwa da ye wow pynkrehkaam ya u chrot-bah chwa ka 21 tarik ini u bnai kawa man ka sngi dap 50 snem ka jylla.
Hawa kylli wa yi wow bahkhlieh lada jia wa sih biang u chrot, neiliang u DC da pyntip u wa iwa sih neini chaphrang lada iwa khian hap bahkhlieh da ki bor District.
