Ynne ka sngi da sdang ya ka 6th Invitation Knock Out Football Tournament ha Wahiajer wada pynman da ka Wahiajer Sport Club, heiwa ka Nongdawah SC da jop ko ya ka Niaw Wasa FC da 3-1.
Ya ki kool ka Nongdawah SC da thap da u Wallamsuk Nongkhlaw (2 kool) wa na u Kynsai Lhuid, katwa ya ka kool ka Niaw Wasa FC da thap da u Niponghi Sumer.
Ha ka yakhun ya i naam Man Of The Match da rah da u Kynsai Lhuid yong ka Nongdawah SC wei ya ini i naam da saam da u Chairman chnong ka Wahiajer u Samson Lamare.
Chwa u sdang kani ka yalehke da em ka yalang wa tbian wa pynlai da u Chairman Sports ka Wahiajer, u Kowel War, u Dr. Lamare wa pait ya ka CHC Ummulong da man u kam u kongsan, heiwa da emlang u Dr. Sumer, Dr. JC Rymbai, Secretary Chnong Wahiajer u Andriew Sari, Assistant Waheh Chnong Wahiajer wa u Lovely Shylla.
Haka 29 tarik uni u bnai ka yakhun u man ko hapyrdi ka Lamare SC pyrchah ya ka LRW FC heipor 1:00 waje i sngi.
Kani ka lympung da wan chimbynta ki dhab na kylleiñ ka jylla heiwa waroh da em ki 32 tylli, kiwa jop u yoh rah ki ya ka song poisa waT. 2 lak katwa kiwa rem ha ka Final won u yoh ki T. 1 lak.
