Hadien ka Election ka Congress daw haap chong ben ko: NPP

Shillong: Ka National People’s Party (NPP) da kam ko wa hadien ka Election 2018, ka Congress daw haap chong ko ha ka liang pyrchah ym yoh de ko u synchaar neibhah wa ym ye ko u krehkaam ha ki snem wa dadep wa em ko hei bor.

Hawa yaklam cha kiwa pathai khubor ynnin ka sngi u wa ektien ya ka NPP u James K Sangma da ong u wa ka dak ka chin che wa ka Congress ym em thaw de ko hadien ka Election 2018.

Hajrong i mih ka khubor wa em ki MLA na kiwi ki party wa kynthup na ka Congress ki wow psiah cha ka NPP, u James da ong wa ka dwar man ko kawa wai ya kiwa kwah u psiah cha ka seiñ.

Ye u kdaw heini wa ka khubor hamsaya wa ki MLA na kiwi ki party kam na ka Congress wa kynthup ya u Rowell Lyngdoh (Mawkyrwat), u Prestone Tynsong (Pynursla), u Sniawbhalang Dhar (Nartiang) wa u Ngaitlang Dhar (Umroi) ye ki wow psiah cha ka seiñ.

Hawa kylli yei wow pdiang ya ki, da ong wa daw man kamwa kylliang kiad ha uwi tawon u klong, u James da ong u wa kini ki MLA ka Congress ym ye ware ki u pynyoo yei bor kreh yong ki neibhah wa leh embor ware u Montri Rangbah, u Dr. Mukul Sagma.

Hei yatoh won wa i yatoh lok wa kiwi tawon ki party u James da ong u wa ya kani ka rai daw chim da ka State Election Committee (SEC).

Related posts

Ya ka Election cha GHADC daw pynbna hadien ka Delimitation

April 15, 2026

Baam smai u Samrat Choudhary kam u CM wa thymme ka Bihar

April 15, 2026

Hei yatoh won wa i thmu yong u Dr. Mukul Sangma wow yakhun na ki ar tylli ki thaw, u James da ong u wa ka rai yong oo man ko ka wym khooid wei ka wym ye u pdiang.

“Lada u Dr Mukul jop u na pyn ar kini ki thaw, daw haap resign u na kawi iwa man i wym khooid neibhah daw man kamwa yoobeiñ u ya ki paidbah kiwa kyrchaan ya oo” da ong u James da pynkut u deiwa ong wa ini i rai u Mukul toh wa artatien u wow jop biang na Ampati.