theme-sticky-logo-alt
theme-logo-alt
Advertisement ad1
Advertisement ad1

Hadien palat 30 snem da pynkhai-im biang ya ka Phet Nangsiang ha chnong Maitdeiñ

Advertisement ad1
Advertisement ad1

Ynne ka sngi ka Dorbar Chnong Maitdeiñ, West Jaiñtia Hills da ye ko u pynkhai-im biang ya ka Phet Nangsiang hapoh ka chnong kawa man leh ka kaam wow yarap wow chaan kylliang iwi ya iwi khamtam hadien wa dadep ah dep choh ya u kba na hali.

Ka Phet Nangsiang toh kawa da pynjooh da ki warim tangwa kattu la kamwa plat 30 snem tam ym em de u pynman ya ka.

Advertisement ad1

Kani ka Phet da pynman hadien wa dadep choh kba wei heipor wa kit ya u kba na Myndoo cha yung da jooh pynman ya ka heiwa ki chynrang jooh kit da bah ki ya u khoo wei da phet da lai dei kjat hadooh wa poi ha yung ki tre hali.

Nachwa ki tre hali kam na Mukhap, Laskein wa kiwi ki chnong jooh pynman ki ya kani ka Phet Nangsiang na ki hali yong ki wa em ha chnong Saba wa Maitdeiñ wei da kit ya u kba chadooh wa poi cha yung (Mukhap, Laskeiñ) dei kjat khlem pynemkaam kari mator.

Da ong wa nachwa ya uwa jop da yoh u T. 1 uwa yoh heiwa ar da yoh u Chipiah katwa uwa le Chi Suka wei i por wa khaddooh da tip wa uwa jop da yoh u T. 50, uwa yoh wa ar T. 30 wa uwa le T. 20 (ini toh palat 30 snem nachwa) heiwa waroh kiwa kit da kit ki ya i khia iwa salonsar i jooh.

Ynne ka sngi hawa pynman ya kani ka Phet Nangsiang da wan sakhi da u MLA ka Mowkaiaw, u Nujorki Sungoh heiwa da wan chimbynta da ki 14 ngut ki chynrang khynroo wa waheh wei na Myndoo da kit ya u kba wa khia kamwa 40 kilo ha ki churia wei da phet hadooh wa poi i yung ki tre hali iwa jngai kamwa palat 1 Kilometer wei uwa poi nyngkong da poi u ha i por kamwa 20 minit.

Kiwa jop ha kani ka phet ynne ka sngi toh u Chanki Iakai, bood sa u Johnsing Iakai heiwa ar wa u Relay Langbang heiwa le.

Hadien ini, heipor kamwa chiteiñ sngi da pynman ya ki yakob wa kynthup ya i thaaiñ kriah, thaaiñ khnaam, taan tylle, Spoon Race wa kiwi kiwi.

Hawa yaklam wa u Waheh Chnong ka Maitdeiñ, u Daarphi Sariang, da khana u ya ka parom yong kani ka Phet Nangsiang heiwa nachwa da leh ya neiwi heiwi i yung wei ya kani da jooh leh ha kiwi tawon ki chnong wa em ha ka thaaiñ.

Chooh chooh da ong u wa ya ini da leh ynne ka sngi toh wow pynneh yeiwa da leh da ki warim wei hanla em ki kari katni da emkaam wow pynkhai im biang ya i yongrim.

Neiliang u Nujorki Sungoh da e khublei wei dap u dei sñiawkmen ya ka chnong wa da ye ko u pynkhai-im biang yeiwa da leh u warim.

Hajrong i thmu wa i angnood ha ki snem wow wan heiyatoh wa ini i kaam, u Nujorki da ong u wa da kyrmen skem wa ha kini ki snem wow wan daw ye u pynman wei wow pynkhai im ya ka Phet Nangsiang wot cha kiwi ki chnong wa em ha ka thaaiñ wa ka Constituency.

Ynne kiwa jop ha ka Phet Nangsiang uwa yoh nyngkong da yoh u T. 5,000, uwa yoh wa ar T. 3,000 katwa uwa le T. 2,000 chirup wa ka Consolation Prize cha kiwi tawon kiwa chimbynta.

Share this:
Previous

Soi soskular ka Reckitt waka Meghalaya yow yarap pynsñiawthoh ya ki kaam chongkha

Next

Ym em kheiñstiñ ki pulit yei maham ka HNLC, da phah pynjoor yei sonteri ki pulit, ong u Lahkmen