Jowai: U Batskhem Pala uwa tip leh kam u Friday da sdang tipmit ka pyrthai ya oo hadien wa mih i video wa chah bom u ha Khliehriat, da chah kem u ynnin i miet ha Ladrymbai, Rymbai Road ha ki paidbah kiwa kdong oo hadien wa dat wei lute u T. 4,500 na uwi uwa yarap yah truck (spare driver) na Moolamanoh.
Uni uwa yarap yah truck kawa em u No. NL-01G-5115 wa tip kam u Eyoudcious Dkhar uwa na ka chnong Rymbai da chah dat syndet u ha u Batskhem da u naar na khlieh hadooh wa yaplær u wei heini i por u Batskhem da lute u oo T. 4,500 wei da yut u na ini i thaw, da pyntip leh wa ki bru wa sakhi yeini iwa jia wei da yarap ki ya uni uwa chah dat wei da kdong ki oo u Batskhem hadooh wa poi ha Rymbai Road, Ladrymbai.
Hadien ini ki paidbah da ekti noh ki oo cha ki pulit.
Ki pulit da thooh chwa ki ya u Batskhem hadien wa mih i video wa chah bom u ha Khliehriat wei da thooh leh ya oo chadooh ki thaw sumaar wa em ha Shillong neidaw wa da pyrkhat wa da mynsoo joor u hadien wa chah dat u.
U Batskhem da tipmit u ya u Eyoudcious Dkhar wei ya uwa yah truck wei da dep paan kreh u na oo kam u Handyman heipor wa kani ka truck dang pynhaap mooyong ko ha Star Cement wei dei wyrai uwa yah da kreh u ya oo.
Ynnin ka sngi uwa yah ya kani ka truck da pynyieñ u ka ha Moolamanoh wei da lai sah u cha i yung u ha Musniang wei dei chaniah ya u Eyoudcious Dkhar wa ya u Batskhem da ekti u wow pait u ya kani ka truck.
Heipor wa dang chet ja ki hajan kani ka truck u Batskhem da dat u ya u Eyoudcious wei hachwa ini uwa yah ya ka da dep e u T. 4,500 ha u Eyoudcious yow thap phniang u ya ka truck katwa u Batskhem won da lute u oo.
U Batskhem Pala toh uwa na Sutnga Pohchnong wei ymtoh u khonswet katkam wa kam u wei dang em bei u chirup wa 7 ngut ki payu u.
Ka VDP Sutnga da jooh kem ki oo boonsien hadien wa leh u ya ki kaam pyrchah aiñ wei pyrchah chnong.
Ha Khliehriat won da chah bom chah dat u neidaw wa tooh u ya ka kymmor, ka TV wa ki woofer na i yung sahwai kawi ka khynnah wa lai skur ha Khliehriat Higher Secondary School wei ini i yung toh i yong u Bhalang Shylla. Yeini da chemdien hadien wa kynreh yei thaw sah u Batskhem wei da chem biang ya kini ki mar wa tooh u wei da suk u chem ya ki neidaw wa u Batskhem sahwai u pyn ha yung u Bhalang Shylla wei da dat da bom ya oo kamwa da mih a i video.
Heijooh i por da em kiwa wan pyndem ha ki pulit kiwa dat ya u Batskhem wei dang thooh ya kiwa dang yut katwa ya u Batskhem won da pynngat ya oo ha ki kyndon aiñ wa pynmynsoo wei lute bru u.
Also Read: Dang thooh ki pulit ya kiwa dat ya u Batskhem Pala ha Khliehriat
Discussion about this post