Ynne i step da mih ka khubor kawa da pynkhyrngiat ya kiwa boon heiyatoh wa i chah siat yap u General Secretary warim ka HNLC, u Cherishsterfield Thangkhiew ha ki pulit ha Kynton Masar, Mawlai heiwa da rah leh ya ki ar ngut ki khon yong oo.
Ynne i janmiet neiliang kiwa pathai khubor da yoh ki wow yaklam wa uwi na ki ar ngut ki khon u Cherishsterfield, u G. Diengdoh uwa khana wa ynne heipor i step synyaaw da sñiaw u yeiwa kieh ka suloi wa em kiwa khyndang ya ka dwar wei da psiah yabor ki cha kamra ki heiwa da chah dat chah kyrtem ki (oo wa u diah u) wei da yoo ki wa u pa yong ki da thiah u ha madan weiwa u pa yong ki uwa em chitom boonjait dang riñ mynsien wei heitu i por ki pulit da suba ki wa kini ki ar ngut ki khon toh kiwa sonteri (Security) u Cherishsterfield.
Da ong u leh wa da chimpor hadooh kamwa chi kynta wow kyrriah ya u Chesterfield cha thaw sumaar.
Heiyatoh wa i kam ki pulit wa da ksoh tari u (Cherishsterfield), neiliang u Diengdoh da ong u wa ka mala wa chajrong dooh toh kawa du ki thawthiah heiwa ki tari waroh em ki ha kamra chetja iwa cha mala wa chatre dooh wei itæ wow em tari ha oo (Cherishsterfield) ymye i wow man kamtæ.
Chooh chooh heiyatoh wa i chah pyndik u pa yong ki ha ki por wa dadep, neiliang u Diengdoh da ong u wa jooh wan ki bru (Intelligence) kiwa wan yaklam wa oo neipor cheipor tangwa ym em pyndik ya oo.
Hajrong i kam ki pulit wa da rah ya ki wow pynsakhiat (Verify) ya ki, da ong u wa hadien wa chah dat ki da rah ya ki cha Sadar Police Station heiwa da chah ksoh ki hadooh kamwa 2-3 kynta khlem em kiwon kiwon wa kylli iyi iyi na ki wei da wan thooh ya ki da ki pulit wow kit cha Khliehriat tangwa ha chiteiñ luti da uiñ biang ki cha Shillong hadien wa tip ki pulit wa kini ki ar ngut toh ki khon u Cherishsterfield.
Heiyatoh wa lada em kiwon kiwon ki kyndon wa da booh ki pulit ya ki, neiliang u Diengdoh da ong u wa ym em kiwon kiwon ki kyndon wa booh ki pulit hajrong ini.
