Hadien wa Dorbar Elaka Shilliang Myntang dadep ko wow lai booh yei dawa kamjooh i maham ha ka 13 tarik uni u bnai ha ki bor District ka West Jaiñtia Hills wa lada ym ye wow yada ya kiwa chong chnong ka Lapangap wow lai ah kba ki, neiliang ka Elaka da maham ko wow rah suloi wa em License ki yow yada ya kiwa na Lapangap.
Ynne neiliang ki bor District da phah ki da u G.H. Passah, Border Magistrate ka West Jaiñtia Hills wow yaklam heiwa da emlang leh u Dolloi ka Elaka Shilliang Myntang, ki dkhot EC, u waheh chnong ka Lapangap wa ki kattu katni ki dkhot chnong heiwa ya ka yalang da pynman ha Barato.
Ha ini i yaklam neiliang ka sorkar da kular ko wow pynneh yei man chngaaiñ ka Lapangap kamjooh u yarap ya ki nong Lapangap u yoh ki u ah yow kba deiwa suk.
Kamtæ neiliang ka Elaka Shilliang Myntang da pdiang ko yei kyrpaad yong ka sorkar wei da booh por ya ka sorkar u leh ko yeini hadooh ka 18 tarik uni u bnai yow pyndep ko yei kularyong ka wei hadien kani ka tarik daw pait yei long i man wei daw pyntip won kammon.
Hajrong ini ka Dorbar Elaka Shilliang Myntang da yaroh ko yei stat wei chemphang yong uni u Magistrate wa da smat u wow wan chadooh cha Barato wow sneiñ u kroo wei wow pynyoo pynkdaw ya kiwa yahkhmat ka Elaka kammon u pynneh pynsah yei chongsuk ha Lapangap.
Ka Elaka da booh ko leh ki kyndon wa emkaam wow e dei thoh yow pyntikna wow e yei yada ya ki warep ka Lapangap, u leh deiwa yoo wow yada ya i wan kiwa na kylla pood kiwa thmu wow leh ki kaam wym man. Da dawa leh wa waroh iwa da dooh toh u su kylliang ka sorkar deiwa biang wei lada ym ye u leh yeini, neiliang kiwa chong chnong em ki ka hok wow yada ya idæ nei wym chikhia hi da waroh ar tylli ki sorkar jylla.
Discussion about this post