Ka seiñ ‘Khooid Ya Ka Wah Myntdu’ ha ka dorbar wa da khutlang ya ki waheh chnong, kiwa kitkaam, ki khynroo khyllood, ki manbei yong ki chnong, ki seiñ warep kiwa em ha tawiar ka wah Myntdu chirup wa ki Executive Member ka seiñ, kawa da man ha ka 20-02-2021 heipor 01:00 waje i sngi ha Yungwalieh ka Tpep Pale Pale Dorbar Chnong Jowai, da chim ya kiwa boon ki rai heiyatoh waka wah.
Ha kani ka yalang da pynyoo yeiwa chem ki dkhot ka seiñ nei lai pait yaka wah nadooh ki thaw sdang mih ko hadooh wa poi cha Ialong.
Kamtæ da chim yaka rai wa nadooh ka 01-03-2021 ka seiñ Khooid Ya Ka Wah Myntdu u lai pynsñiawthooh ko cha waroh kiwa chong chnong ha ki dorbar chnong waphær waphær kiwa em ha tawiar ka wah Myntdu ya iwa emkaam yow man ka wah kawa khooid.
U kyrpaad ya u DC ka West Jaiñtia Hills District wow pynkhor yei pynkrehkaam ya ka aiñ kyndon Section 144 CrPC yow khang pyrchah ya ki bru kiwa tih chyiap, tih moo, sait kari, sait that, u lai ki kari kit moo kit chyiap, u pynkai ait, pynkai jakhlia cha ka wah Myntdu.
Khnang yow nang im ki doh ha ka wah Myntdu, da rai ka dorbar wow e dei thoh cha ka JHADC kawa man i bor wa pait wa yoo ya ki wah ki chka, wa u ebor ko ya ki dorbar chnong lyngba ki waheh chnong yow ye ki u tong ya u chyiap na ka wah Myntdu ha ki pood ki ang ki yong ki.
Ka JHADC toh u khang pyrchah ko u deiñ ya ki dieñ ha rood ka wah Myntdu, wa u tih khyndaw tih chyiap na chrooh yong ka wah Myntdu.
Da rai wa u pynman ha u Naitung (April) 2021) ya ka pynkhooid ya ki liar ki chka ka rood ka wah Myntdu da ki dorbar chnong ha jar jiar u pood u ang u yong ki.
Ka dorbar waroh kawi dei mynsien wa sñiawkhia, kyntu joor ko ya waroh kiwa chong chnong wa u sñiawbha ki u leh bha leh khooid ya ka tawiar ka wah Myntdu, deiwa dam u noh ya ki jri, ki plastic, u chna ya ki Septic Tank, u leh khooid ya ki liar ki nylla yow lait u tooid u haap ki um na ki yung cha ka wah Myntdu.
