Hadien wa ka Khasi Students’ Union lyngba ka Employment Monitoring Cell wa kiwa yahkhmat ka seiñ na ka North Khasi Hills District Unit ynnin ka sngi da hiar ki cha ka College of Post Graduate Studies in Agricultural Science wa em ha Umiam yow yachem wa u Dean kani ka College heiwa mar ya tip u yeini da yut u na kani ka College deiwa ong wa em u cha Guwahati wei ini da pynman ko ya ka seiñ wow khang tala ya ka yung krehkaam yong oo wei mar ya jia da wan mih u cha ka College.
Ini i leh ka seiñ toh yow dawa pynman ya ka Exam yaleh kreh Lower Division Clerk wa Upper Division Clerk kiwa ka College da booh ko ya ka Exam Centre ha Guwahati wei ini da pynjynjar ko ya kiwa yalehke kreh kiwa napoh ka jylla wow lai thoh ya ka Exam neidaw wa boon toh kiwa wan na ki manyung wa dooh wa duk.
Ka seiñ da suba joor ko wa da leh yeini yow pynsuk ya kiwi kiwa na baar jylla wei ki daw toh wa ha ka Advertisement wa da pynlait nadooh u snem 2023 wei ka Exam da toh u thoh ha u July, 2024 ha ki thaw waphær waphær ha Umiam wa Shillong tangwa da kyrriah noh yow pynman ha Guwahati ha ka 3 wa 4 tarik u January, 2025.
Iwa da pynphylla leh wa ki bru kiwa na Garo da thoh Exam ki ha Tura, na Manipur da thoh ki ha Imphal wa kiwi kiwi ki jylla leh man ki kamtæ tangwa ya ki Khasi won da phah cha Guwahati.
Ha ka 22 tarik leh dadep ka seiñ wow booh dei thoh ha u Dean wa u VC ka CAU tangwa ym em leh ki iyi iyi heiyatoh wa ini iwa da pynman ya ka seiñ wow lai hiar cha kani ka thaw ynnin ka sngi.
Ha ini i yaklam ym man ko kawa ryntih neibhah wa u Dean ym em kwah u wow pdiang yei bakla yow pynbait ya ka Exam ha Umiam næ Shillong iwa da pynman ya ka seiñ wow beh noh ya oo na College wei lada ym pynbait ym chah de wow man u kam u Dean kani ka College wei wow wan yooh kjat ha ka jylla.
Kamtæ ynne da phah chithi u Dean cha ka KSU wa ya ka Exam yalehkreh LDC, UDC wa Field-cum-Lab Assistant (FCLA) u pynman noh ha College of Post Graduate Studies in Agricultural Sciences wa em ha Umiam ha ka 3 wa 4 tarik u January 2025.
Discussion about this post