Hadien wa yoh u payu hei 2nd Position, yoh ka diah hei 5th Position ha ka SSLC

Ka Jenita Pator kawa lai skur ha Sawlyngdoh Higher Secondary School, Mowkaiaw da yoh ko ha ka 5^th Position ha ka Result ka SSLC 2026 kawa da pynmih ynne ka sngi da ka MBOSE.

Ka Jenita da yoh Distinction ko ha ki 6 tylli ki Subject heiwa ki Marks ko dapoi 571 wei man ko ka khon ka Bary Pator wa u Deibormi Sten kiwa na ka chnong Mowkaiaw wei u payu ko, u Wanteibok Pator ha u snem 2021 da yoh u ha ka 2^nd Position ha ka SSLC hi.

Hawa e yei klam, da e ko yei sñiawngooh ya u Blai deiwa khana wa ynne hawa yoo ya ka Result ym em sñiaw ye ngait ko. Kamtæ da e khublei ko ya kiwa sikai skur kiwa da e yarap bait ya ka ha iwon iwon i wym sñiawthooh.

Da ong ko leh wa ha i pynkhreh ya kani ka Exam da hap bha wow ngam yillu neidaw wa da em iwa da pynkylla namo ka Pattern. Wei i khreh kot ko toh iwa biang khlem da pait miet tangwa deiwa sñiawthooh iyi wa da khreh ko.

Da khana ko wa kwah ko wow lai puræ Science wei ya iwa hadien daw yoo won.

Najrong i khreh kot da sñiawsuk ko wow leh ki Drawing, i ap sur, u chimbynta ha ki thoh Essay, Extempore Speech, Quiz wa Debate wei da jooh jop ko leh ya ki yakob hapoh ka Block wei hapoh ka District dadep yoh ko hei wa le.

Da khana ko leh wa i khreh kot toh iwa boon na ki kot skur, ki Notes wa e kiwa sikai wei ka da chna hi ko leh ki Notes da ka hi.

Neiliang won uwi uwa sikai Maths ka skur da ong u wa ki skur wa em cha palatsor leh ye hi ki wow poi chakhmat wei ka Jenita leh toh kawa lehbha ha ka Subject wa hikai u wei da yoh ko leh 99 Marks wei da yooluti hi u wow poi ko chakhmat.

Kamtæ da ong u wa kamwa yoo katni kiwa em cha palatsor kwah ki wow lai cha sor tangwa kamwa yoo hi hanla em ki cha ki chnong ki thaw yong ki hi leh ye ki wow poi chakhmat.

Neiliang ka bei ka Jenita da pynsñiaw ko yei kmen wa hadien u snem 2021 heiwa u khon ko da yoh u ha ka 2^nd Position, wei kattæ leh sa kani ka khon ko de ye ko wow poi chakhmat.

Related posts

Kyrchaan ka JAC yei yakhih ka Jaiñtia Coal Miners and Dealer Association

April 7, 2026

Yap u khynnah wa i khonboo ha Manipur deiwa em wa siat da ki Bomb

April 7, 2026

Hawa e khubor cha kiwi ki manbei, da ong ko wa emkaam wow pait u sylli ya ki khon wei ymtoh wow chniah du ha kiwa sikai skur wei wow chakri leh ya ki khon yow e yeiwa emkaam ki.

Neiliang u pa da ong u wa lada yoh ko katwa yoh leh u ya kmenlang u wa ka khon u, wei ya ka Jenita da yooluti hi u wow poi ko chakhmat wei man ko kawa kmen ya ka yung ka sem wa sa chisien da em biang wa poi chakhmat. Da kitbok kitrwiang u ya ka skur wow ye chooh chooh ko u pynmih ki khynnah kiwa daw poi chakhmat deiwa em ki yei thrang mynsien ha ka puræ puthi.