Hadien wym ye ka sorkar wow e yarap cha kiwa yap ha Lapalang, wan da ka MPA

Ka Meghalaya Paragliding Association (MPA) da wan ko chakhmat wow tyrwa yarap cha ka manyung kawa da dooh ya ki ar ngut ki chipayu kiwa man leh du ki kiwa khih yow pyndap pynbiang ya ka yung ka sem kiwa da dooh noh yei mynsien hawa pyrchang wow lai yarap ya ki le ngut kiwa em hapoh kawi ka thlu-um iwa da jia ha ka 10 tarik ha Dongmadan, Lapalang.

Ini i wan ka MPA toh hadien wa da mih khubor wa ka sorkar jylla ym ye ko wow e yarap neibhah wym chah ki kyndon lada jia yap ha thaw kreh hanla em 5 ngut kiwa yap leh.

U President ka MPA, u Nikolai Singh hawa e yei klam da ong u wa sñiawthooh hi wa ka sorkar em ko ki kyndon tangwa i chlur kini ki ar ngut ki chipayu ym em wow tipmit ki da kiwa em hei bor.

Kini ki ar ngut ki chipayu khlem da tipmit ya kini kiwa em hapoh ka thlu-um da hiar ki khlem da pyrkhat neibynta yong ki hadooh wa dooh ki yei mynsien wei ini pynyoo sakhiat ko yei chlur mynsien, da ong u Nikolai.

Related posts

Kit ka um ya i yungmane ha Arunachal Pradesh

July 13, 2026

Da pynthymme ya kiwa kitkaam ka Thadlaskein Sports Association

July 13, 2026

Hadien wa chong yachem ka MPA deiwa emlang u General Secretary, u Bajop Pyngrope da rai wow bahkhlieh noh yei puræ puthi ki ar ngut ki khon u Sunil Thakuri hadooh wa pyndep ki ya ka Class XII. Kawi toh kawa 10 snem kawa puræ Class IV wei u diah ko toh uwa dang 6 snem uwa lai puræ Class I.

Ka MPA da pynbna ko leh wa daw yarap ko da ka poisa wa ₹5,000 man-u-bnai yow thied baam wei lada em i kjut i chitom leh daw e yarap ko hadooh wa dap ki 18 snem i rta.

Ka Asenla Nongrum kawa man kam ka tre yung wa chong wai ki chi payu kiwa da khlaad noh, da kyntu ko ya ka sorkar wow pyrkhat ko deiwi wei wow e yarap cha waroh san ngut kiwa da khlaad noh.

Da ong ko leh wa kini ki chi payu toh kiwa pyndap pynbiang ha yung wei kattu ym em de ki kiwa khih wa khan wow kyrchaan ya ki.

Kini ki ar ngut kiwa da dooh yei mynsien toh kiwa tip kam u Sunil Thakuri (34) wa u Umesh Thakuri (30) wei katkam wa khana ka Asenla dang wan wot ki na yungmane heipor wa sñiaw ki yeiwa em ki bru wa paan yarap wei khlem da pynslem da lai ki cha ini i thaw wa jia.

Da ong ko leh wa ki tre yung wa jia ini deilang u Contractor hap ki wow chim yei bahkhlieh wei wow e yarap cha kiwa kreh hapoh ka thlu-um kiwa da dooh yei mynsien ki.