U montri rangbah ka jylla, u Conrad K. Sangma ynne da chimbynta u ha ka yalang World Tourism Day Conclave wa pynman da ka Ministry of DoNER, Govt of India hajrong ka phang “Emerging Delightful Destinations”, heiwa da ong u ya i bynta wa kongsan tam ka kaam uiñke suwari toh wow pynku ya i yoh i la wa i yoh khih yoh kreh.
Neiliang ka North Eastern Council, Ministry of Development of North Eastern Region jooh pynman ko ya kani ka yalang man u snem ha kylleiñ ka ri wow pynyoo yei man mahajon i rukom im ha ka thaaiñ mihsngi wei ha uni u snem neidaw wa em ka khlam COVID-19, da pynman noh ya ka yalang Online wei da wai ya ka da u montri ki kaam pohyung, u Amit Shah wa u Dr. Jitendra Singh, uwa man leh u montri ka DONER.
Hajrong ka phang yong ka World Tourism Day kawa ong “Tourism and Rural Development”, neiliang u Conrad da ong u wa kani ka phang pynkynmoo ko ya waroh yei myntoi ka kaam uiñke suwari wa i pynku ya i yoh i la ha ki thaw palat sor.
Da ban joor u leh hajrong i kyrkhu wa yoh ka jylla Meghalaya nadooh ki khloo, ki kchaaid, ki krem, ki mrad khloo, wa kiwi kiwi deiwa e nongmuna leh ya ka Sohra, Mawlynnong, Shnongpdeng wa Nokrek.
Da pyntip u leh wa ha u 2019 hapoh Meghalaya da em hadooh 1.2 Million ngut kiwa wan uiñke suwari (Tourist) wei ini da yarap bha i yei yoh i la wa i khih i kreh ki bru ka jylla.
Chooh chooh da pynrap u leh wa ka khlam COVID-19 da ktah bha ko yeini i kaam hapoh ka jylla wei ka sorkar leh da pynkhreh ko ya ka luti wow pynku biang ya kani ka kaam hapoh jylla.
Da pyntip u leh wa ka sorkar da kwah ko wow wanrah ya i seiñ khih ha ki thaw uiñke deiwa chna ya ki Resort wa ki thawsah wa sy’ad dor (Luxury Tented Accommodation) ki wow yarap pynku biang ya ki kaam uiñke ha ki thaw palatsor.
Heiyatoh wa i pynyabi da ki lieñsuiñ namo ka Air Connectivity, u Conrad da ong u wa ki Direct Flight na Delhi cha Shillong daw sdang noh ki na u Naichiphaw 2020, wei ini daw yarap pynku bha i ya ki kaam uiñke hapoh ka ri dei kyrmen leh wow sdang noh leh ya ki Direct flight cha Shillong cha ki sor kam ka Mumbai wa Hyderabad.
