theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Hadooh 10 tylli ki karkhana Coke wa em hapoh 1 Km: ECC

Advertisement ad1

U Reading War, Legal Adviser ka Environment Co-ordination Committee (ECC) ka Sutnga Elaka da ong u wa da em ki Montri sorkar kiwa da ong wa ym ye wow khang ya kiwon kiwon ki karkhana kiwa da biang ki kot ki sla wei kam ki khon ka Elaka ym ye ki wow pdiang ya ini neibhah wa kini karkhana Coke toh kiwa maa kawa da ktah ya ki bru wa sah hajan kini ki karkhana. Kamjooh da pyntngit ki ya ka la-ær, ki um ki wah wa ki jhoor ki jhep wa thung neidaw wa kini ki karkhana pynmih ki ya kiwa boon ki bih.

Da beiñ u leh ya iwa ong ka MSPCB wa ym em kam kitæ ki bih wa mih deiwa wan ki wow pait du chi sngi donhi, kamtæ ym ye ki wow chem yeiwa sakhiat wa i eh wa maad ki paidbah. Heiwa heipor wa wan pait ki da chem ki wa da boon ki karkhana kiwa da sdang krehkaam khlem da yoh bor tangwa ym em pynchitom ya ki.

Da pynsñiaw u leh yei phylla yeiwa ong u Montri wa pait ya ki karkhana wa ym ye wow khang yei e bor da ka Single Window Agency (SWA) lada em kiwa kwah wow seiñ karkhana khamtam manda da yoh ya ki NOC na ki bor chnong bor Elaka. Tangwa ha ka RTI wa da paan da yoh yei jubab wa ki NOC na ki Waheh Chnong wa na u Dolloi ym toh kiwa man wa emkaam wow booh ya ki karkhana.

Ha ka RTI da chem leh wa da em 48 tylli kiwa da yoh bor lyngba ka SWA wei na kini da em 7 tylli kiwa da yoh ya ka Consent To Operate (CTO) iwa mut wa da yoh bor wow pynkrehkaam wa 6 tylli da yoh ki ya ka Consent To Establish (CTE) iwa mut wa da yoh bor wow sdang chna ya ka karkhana.

Chooh chooh da chem wa ki karkhana wa yoh ya ki CTO kiwa man kam ki Stand Alone Unit iwa mut wa toh u em du kawi hapoh 1 Km tangwa kini ki karkhana Coke da em ki hadooh 10 tylli hapoh ka chi Kilometer. Da em leh kiwa yoh CTO kiwa em harood sarok PWD wei kiwa em hapoh ki chnong.

Heiyatoh won wa ki NOC wa yoh na ki chnong wa da em ki karkhana Coke, da e nongmuna ya kiwa em hajan ka chnong Moopala, deiwa ong wa kani ka chnong toh kawi na kiwa chah ktah dooh heiwa da em da ki phaw tylli ki karkhana hajan kani ka chnong tangwa ka chnong ym jooh em e NOC ko nadooh nachwa hadooh katni yow booh ya kini ki karkhana Coke wei i pynbaad wa da e NOC ka chnong toh iwa bakla wei i wym ye u pdiang. Wei lada em wa e NOC da kiwi won ki chnong, itæ ym em u man neibhah ka aiñ ym chah ko ya ini neibhah emkaam wow yoh NOC na ka chnong wa em ka karkhana.

U Reading War da ong u leh wa da tip wa kam kini ki karkhana man ki kiwa maa bhah kiwa haap hapoh ka 1st Schedule ka aiñ Factory Act heiwa ya ka Coke da booh yei rukom krehkaam ko kawa maa bha namo ka Hazardous Process hadooh wa ki wakreh yong ki karkhana leh hap wow yada bha ya ki.

Da pynsñiaw leh yei yoh mynsien hadien wa u montri ki kaam poh yung da e hukum u ha u SP wow phah khang ya ki karkhana Coke kiwa man pyrchah ya ka aiñ kiwa em hapoh ka East Jaiñtia Hills District. Deiwa phah leh wow takit neiwon yoh mar kini ki karkhana wow pynemkaam ya kitu kiwa da yoh bor wow krehkaam.

Tangwa da ong wa hadien wa 3 tarik uni u bnai wa da lai khang ya ki kattu katni ki karkhana Coke, ki tre kini ki karkhana ym bna ki yeini neibhah i pynkrehkaam ya ki dang lai bait ki. Kamtæ hajrong ini ka ECC wa ki khon ka Elaka Sutnga daw yachong pyrkhat ki hawa yatoh wa ini i kaam.

Share this:
Previous

Da pyndam yei pynman Micro Containment ya kiwa boon ki thaw ha West Jaiñtia

Next

Da sdang ya ka e sikai Online neibynta kiwa sikai skur