Shillong: Ka tnat Sports & Youth Affairs ynne ka sngi da pynkup burom ko ya ki wa yalehke ha ki jait sports wa boon jait kiwa napoh ka jylla kiwa da yakhun ha ki kyrdan district kamjooh leh ha ka kyrdan yong ka ri ha ka yalang wa pynman ha Indoor Sports Hall, Polo Ground, J. N. Complex, Shillong.
Ha kani ka sngi u Working President, Meghalaya State Olympics Association, u John F. Kharshiing da wan u kam u kongsan.
U Kharshiing da yaroh u yei kreh chitom kiwa yalehke kiwa da wan rahnaam ya ka jylla. Da ong u leh wa na ki 206 tylli ki ri wa yaleh Olympics, ka India em ko ha ka kyrdan wa 67 katkam u snem 2016. Kamtæ da pynchlur wow kreh chitom chooh chooh yow poi cha ka thong jop kawa ha khlieh dooh wei da kyrpaad u leh ya ki manbei manpa wow pynchlur ki ya ki khon yong ki ha ki kaam yalehke wa em sap ki.
Kani ka pynkup burom man ko leh kam chibynta ka sngi kha uwa leh Hockey wa pawnaam ka India u Major Dhyand Chand Singh heiwa da tip ya ka kam ka National Sports Day kawa da pynman ha waroh kawi ka ri.
Ha kani ka sngi da pynkup burom ya 100 ngut kiwa yaleh ha ki 7 tylli ki jait sports deiwa e cha ki leh ya ka songpoisa.
Da emlang leh ha kani ka sngi u Director, Social Welfare, H. M. Shangpliang, Director, Sports and Youth Affairs, ka M. W. Nongbri, ki District Sports Officers na kiwa boon ki District, ki coach wa kiwi kiwi.
Discussion about this post