Jowai: Ka Chiruplang Sports & Socio Cultural Club toh kawi na ki seiñ hapoh ka West Jaiñtia Hills District kawa da mih pyrthai dang ha kini ki kajiak snem, heiwa ka thong wa hakhmat yongka toh wow pynlum pynlang u sai u pynmih pyrthai ya ki khynnah em sap ha ka yalehke Football.
Ya ini da leh da ka Selection Trial wa pynman ha ka 12 tarik uni u bnai ha Madan Jrisalein hei pait i pynlai u Head Coach, u Ryum Khonglah chirup wei yarap ki Assistant Coach heiwa hapyrdi i synraanlang ki bei ki pa ki khynnah na kylleiñ ki bynta ka West Jaiñtia Hills District wan ki wow chimbynta wei wow pynyoo yei sap yong ki.
Katkam i khana u Ryum Khonglah, da ong hadien wa da yoh ya kini ki khynnah i rukom e sikai wei pynpliah pynjanai chooh chooh yei sap yong ki u sdang i nadooh ka tayaw khaddooh u Duyatra (January) wei heipor wa yoh chuti i e sikai næ practice u man i le sien chi tayaw katwa heipor man skur won u pynman du ha ka Sngi Choh-that (Saturday) donhi.
Chooh chooh leh khana u wa ki khynnah kiwa chah jied u psiah ha kani ka Chlem Sikai, u haap ki leh u Soi ya ka Bond kawa le snem kawa man dei ya sñiawthooh yumut wa ki bei ki pa yong ki khynnah wei ka thong yong ki toh wow pynyoo pyrthai yei sap ki khynnah ha ki yakob næ ki lympung (Tournament) wa man cha baar yong ka District, ka State wa cha kiwi kiwi ki thaw donhi ymtoh u yachimbynta ki ha ki lympung wa pynman hapoh ka District.
Kheiñkyllumlang waroh ki khynnah wa da yoobit yoobiang da ki bor pait bor pynlai wow pynpsiah hapoh kani ka chlem sikai ha kani ka sngi em ki hadooh 113 ngut heiwa ha ka Under 14 da em 62 ngut ki chynrang, ha ka Under 12 da em 35 ngut ki chynrang, ha ka Under 10 da em kamwa 10 ngut ki Chynrang wa 6 ngut won ki kynthai Open Category.
Discussion about this post