Jowai: Ka lehniam Behdieñkhlam yong ka Raij Muthlong da poi ko chawa kut ynne ka sngi ha Biar Nohrong ka Raij wa em ha Thadmuthlong, heiwa da wanrah hadooh 21 tylli ki rot wa ki rong kiwa da chna dei dur yung bru, i rong wa klam yei emkaam wow yada ya ka rymaw wa kiwi kiwi.
Kani ka lehniam da sdang ko nadooh ynnin ka 4 tarik deiwa pyndep ya ki lehniam kamjooh leh ka chaad ha talawiar ki chnong ka Raij.
Ynne ka sngi khaddooh dang step da pyndep ya ka lehniam wa tip kam ka Sang Sngi Khlam ya kawa da pyndep da u Chutia ka Raij.
Manda poi chiteiñ sngi ki khon ka Raij na kylleiñ da pynpoi ki ya ki rong ki rot yong ki cha Biar Nohrong heiwa da chaad ka-it mynsien ki khon ka Raij hei kieh ki bom, ki bhuri, ki bikur wa chna da ki siej, wa kiwi kiwi kiwa pynchongchit ya kiwa chaad.
Ha kani ka sngi ya ka lehniam Behdieñkhlam da wan sakhi leh da u CEM ka JHADC u MB Rymbai kam u kongsan, hei emlang ki Dolloi na ka Elaka Jowai, Elaka Shangpung, Elaka Raliang, ki MDC, ki heh yong ki Seiñraij na kylleiñ kylleiñ.
Ya kani ka Behdieñkhlam da wan sakhi da ki hajar na kylleiñ ka Ri Loom Jaiñtia wa Khasi.
Discussion about this post