Shillong: Ka seiñ All Jaiñtia Students Union Shillong Circle da pynhaap pyrda noh ko ya ka 6th Jaiñtia Meet 2017 ynnin ka sngi ha Don Bosco Hall Laitumkhrah heiwa u MLA ka War Jaiñtia u Stephanson Mukhim da man u kam u kongsan katwa ka Violet Lyngdoh MDC Khliehriat da man ko kam ka symbood kongsan.
Ha kani ka sngi da pyllai ka yalang da u Goldenstar Suchiang wei chwa wow sdang ka Programme da yoh yei rwai pdiang burom na ka Morealda Paswet ,da yoh i klam na u President ka AJSU u Eleazer Christopher Dkhar heiwa da khana u yei thmu ka seiñ wow pynman ya kani ka yachemlang.
U Samson Pohthmi uwa man kam u sahep ka Sale Taxes ha kani ka sngi da ong u wa ymtoh u dooh mynsien ki lada yoh ki yeiwa ar namo wa le neibhah dang em ka laad wow yakhun wow poi cha i naam wa nyngkong.
Ka Violet Lyngdoh hei klam da engooh ko ya u blai wa da wailaad u ya kiwa pyllai ya kani ka yachemlang neibhah wa da kynmoo tamdien ko ya ki por wa dang em ko hapyrdi ki snem 1983 heiwa dang man ko kam ka khynnah puræ. Da kyntu ko leh ya kiwa emlang wymhoi u pynsepai ki yeini neibhah wa chiboon i myntoi wa ye u yoh na kam kini ki yachemlang.
U Mukhim hei klam yong oo kam u kongsan da ong u wa dap u dei kmen wow emlang ha kani ka sngi wei da ong u leh wa kani toh ka sien wa ar wa man u kam u kam u kongsan ha kani ka yachemlang neibhah wa nachwa da jooh sakhi u ya ka heipor wa dang em kani ka seiñ wa ka JSU. Da kyntu u leh ya waroh wow em i mynsien yatylli wei wow man ki kiwa kreh chitom wei wow yait na kiwon kiwon ki kaam sih kam i dih ya ki mar pynmuaid kam ki drugs wa kiwi kiwi.
Ha kani ka sngi da pynkupburom hadooh 26 ngut kiwa pass bha ha ki exam yong ki wei heijooh i por da pynkupburom leh ya u Ferdinand Suchiang uwa da rah naam ha ka yalehke Jeet Kune-Do.
Ha kani ka sngi da pynphooh ya ka yachemlang da ki Chaad, ki rwai wa kiwi kiwi.
Discussion about this post