November 22, 2022
Ynne ka sngi ha iwa jia ha Mukroh hawa yaklam wa uwa yah ya ka kari Maruti 800, u P. Pale uwa lai luti nei thaw wa chah kdong ka truck wa beh ki pulit ka Assam deilang wa ki Forest Guard, da pyntip u wa heipor 1:30 i step synyaaw da em ki pulit kiwa da yang ya ki ha luti heipor wa wan kit kba u ar churia tam chirup wa ar ngut kiwi tawon.
Nei tieñ da ong u wa da khang (Lock) ki ya ki dwar kari tangwa ki pulit da kyrtem ki ya ka kari wei da tympiah ki ya ki yit da ki tdong suloi wei da sai ki ya arngut na kari heiwa da chah dat ki tangwa oo mar yoo yeini da yoh u wow yut da ka kari na ini i thaw wei da lai rieh u cha khloo.
Advertisement
Hei step manda tip ki paidbah wa em kiwa chah rah ha ki pulit ka Assam, da mih ki paidbah na chnong wow dawa pynlait ya kiwa da chah rah heitæ wot jia ini i chah siat ki paidbah khlem maham.
Hawa yaklam wa ki pulit ka Meghalaya da khana ki wa ha i step wa jia ynne ki pulit ka Assam da siat ki palat 40 sien cha ki paidbah.
Tangwa da chem ki pulit 36 tylli ki snop (Casing) kuli ki waphær waphær iwa pynyoo wa da pynemkaam da ki suloi SLR, 9mm Pistol, ki INSAS wa kiwi kiwi.
Ha ini i jia najrong ki 6 ngut kiwa chah siat yap da em leh ar ngut kiwa mynsoo kuli heiwa uwi da toh u na jan i khmat wa uwi na ngaab wei kini toh u Sheini Nartiang uwa 48 snem na Mukroh wa u Elias Samayang uwa 36 snem na Mukroh hi wei kini pyn-ar dang em ki hapyrdi i chah sumaar ha Jowai Civil Hospital, Ialong.
Advertisement
