Jowai: Ka Bharti Foundation kawa man ka tnat kreh monsñiawbha ka Bharti Enterprise yow pynku yei rukom sikai kamjooh ka puræ puthi ha ki skur Primary wa Higher Secondary ynne ka sngi da wan wai ko ya ka Satya Bharti Quality Support Program Meghalaya Project hei emlang u montri ka tnat puræ puthi u Lahkmen Rymbui ha District Library Auditorium, Jowai.
Ka Bharti Foundation da jied ko wow leh ya ini du hapoh ka ri-loom Jaiñtia hadien wa kynjoh ktien u Vincent H Pala, MP ya ki wei da jied 50 tylli ki skur mar 25 ha ka wi ka District hei yarkehlang waka tnat puræ puthi ka jylla.
Ka Bharti Foundation dei bor yong ka samen da em ko hadooh 21,000 tylli ki skur ha ki 13 tylli ki jylla wei da pynlai ko leh ya kini ki skur deiwa bood ya ki kyndon ka sorkaar deiwa saam ya ki Midday Meal yow sñiawthooh u kreh wa ki skur sorkar wei waroh man i iwa mynkna.
Kani ka Quality Support Program i thmu yong ka toh wow pynpsiah ya ki khynnah wa da dam skur, u pynduna ya kiwa dam skur chiteiñ por, u pynpliah yei bor puræ dak thoh ki khynnah, u pynkhlan yei sñiawthooh ki ya ka Subject Mathematics wa kiwi kiwi.
U DM Wallang, ADC hei klam yong oo da pynkynmoo u ya kiwa sikai kiwa emlang ha kani ka sngi wa hapoh West wa East Jaiñtia Hills District ka Pass Percentage em ko hapyrdi 71-72% iwa duna lada wyrchaw wa kiwi ki District kiwa da lai cha khmat. Da ong u wa Result ki khynnah leh man ko ka Result yong kiwa sikai heiwa ki khynnah wa Pass toh kiwa boon hi toh kiwa yoh 3rd Division.
Da ong u wa kam kiwa sikai toh u ye ki u e mynsien ya ki khynnah wow kreh chitom.
U Lahkmen Rymbui won hei klam yong oo da ong u wa ka jylla Meghalaya won ym em kom ko ha ka puræ puthi lada wyrchaw wa kiwi ki jylla hapoh ka thaiñ mihsngi heiwa da em ko hadooh 14,000 tylli ki skur wa 51,000 ngut kiwa sikai wei ha ka mang poisa ka sorkar leh da booh boon ka bhah neibynta yong ka.
Da ong won u wa sñiawsih won u yoo wa ki Result ki skur sorkar toh kiwa tlot bha wei ya kiwa sikai ka sorkar da pynbiang lut ko waroh khamtam ka tulop hanlada kattæ leh emkaam u pait cha ka mynstep wow pynthymme noh ya ini.
Da yooluti u leh wa kani ka Project ka Bharti Enterprise u man ko kawa jop.
Kiwi de kiwa emlang ha kani ka sngi toh ka R.S Manners, Additional Deputy Commissioner, East Jaiñtia Hills District, ka D. Khongiong, Joint Director, District School Education and Literacy, Shillong, ka M. Pde, District School Education Officer, Jowai, L.M. Darnei, DMC, SSA, Raveendra Dessai, CEO, NESA Circle, Airtel, Binu Nair, General Manager Bharati Foundation.
Discussion about this post