Ynne ka sngi ka FKJGP-Jaiñtia Hills District da pynman ko ya i lai paidbah namo ka Rally na Laad Kiang Nangbah Government College chadooh Iawmusiang wow dawa na ka sorkar wow pynbait noh ya u pood ka Meghalaya wa ka Assam.
Manda poi ha Iawmusiang ha Madan Kñia Khad da em ka yalang wa pynlai da u Nangkhraw Ranee uwa man u General Secretary ka FKJGP – West Jaiñtia Hills.
Ha ka yalang, u Asst. Waheh Chnong ka Lapangap, u Samkhih Situng da ong u wa nadooh u snem 2021 da maad ki yei eh wa joor nadooh wa chna sarok ka sorkar Assam heiwa da leh embor ko hapyrdi i pyrchah ka chnong wei ini toh neidaw wym em ka jylla ya u pood wa paka deiwa pynrap wa uni u sarok lai u napyrdi ki hali yong ki paidbah ka chnong.
Da ong u wa i pyndik ki sorkar Assam da pteiñ i heiwa manda thung ya ki dieñ wa yoh na ka chnat Basin leh da chah phut ki hapoh i yahkhmat ka KAAC.
Chooh chooh da pynkynmoo u yeiwa jia ha u 2025 heiwa ki warep ym yoh ki wow ah ya u kba yong ki wot lada em ki ya ki Pata wa Land Holding na ka JHADC.
Da ong u wa hadooh kattæ leh ka chnong da chah ktah ko heiwa em ki hali wym chah ki pulit ka Assam tang wow rep leh wei ini toh i por wow rep wow riang ki bru ha ka thaaiñ.
Heijooh i por da ong u wa da lai yachem ki ya ka JHADC wa ka sorkar boonsien tangwa da man i kaam wa kut kamtu donhi.
Discussion about this post