U Symbood Montri Rangbah ka jylla, u Prestone Tynsong da ong u wa kamwa da ong u wa ka dwar ka sorkar toh kawa wai yow yaklam hajrong kiwon kiwon ki phang, mynstep ka sngi daw yachem wa ki seiñbhalang yow ap yei dawa wa kiwa emkaam wa da booh ki.
Hajrong ini i pynbaad wa ka sorkar pynjem palat ko ya ki seiñbhalang, u Prestone da ong u wa toh du kani ka sorkar hanla da maad ko chiboon i eh nadooh u snem 2018, tangwa ynnu ynnu leh ym em won ki jia wa sñiawsih, wei ye u man wa na ini i daw wa ki bru ki pyrkhat ki wa kani ka sorkar ym nood wei jem ko.
Tangwa da ong u leh wa wot ki seiñbhalang da ong ki toh du kani ka sorkar kawa ap wei kawa ye wow yaklam ya kiwon kiwon ki phang yong ka jylla.
Hawa kylli yei khleh saiñpyrthai hajrong i jia hawa lai paidbah wa da pynman da ka FKJGP ha ka 28 tarik u Naichiphaw, u Prestone da ong u wa ym tip u iyi iyi ya ini wei ym ye u wow klam tangwa ki paidbah daw bichaar ki neibhah ki seiñ leh em ki yei sñiawkhia ya ka jylla wei kamjooh ka sorkar wei toh na ini kattæ da emkaam wow chong yaklam.
