Hadooh Rs. 2.6 lak chah thok uwi ha ki bru wa kam toh kiwa kreh sorkar

Ki bru ha kylleiñ ka India da chah thok ki ha ki damok wa dawa poisa deiwa kam wa man ki ki sahep yong ki chnat ka sorkar pyrdi kam ka chnat Customs wei lada ym su ya ka poisa da pyntieñ ki da ki kyndon aiñ wa kiwi kiwi. 

Ha kani ka kynti uwi u bru wa 50 snem i rta na Colaba, Mumbai da chah thok u ha kam kini ki damok kiwa pynemkaam ya ki buit wa ha rukom. 

Uni u bru da chah thok u hadooh Rs. 2.65 lak hadien wa poi Phone u wa em i yusong tiar (Parcel) hei pyrtuid yong oo wei ini da sdang i nadooh ka 17 tarik uni u bnai deiwa em kiwa Phone lyngba u Skype wa kam toh kiwa kreh ha ka chnat sorkar wei ini i tiar toh i wow phah cha Taiwan tangwa da chah ksoh i ha Mumbai Airport neidaw wa hapoh ini i yusong da em ka Laptop, Passport, Credit Card wa i Drugs.

Hadien ini nei tieñ uni u bru da sdang u wow phah poisa cha kini ki damok kiwa da kylli chwa ya u Aadhaar, i pyrtuid wa i thaw sah yong oo. 

Heijooh i por kini ki damok hadien wa yoo wa da tieñ uni u bru da sdang pynemkaam chooh ki ya ki buit yong ki wow pyntieñ ya oo deiwa ong wa katkam u Aadhaar u, da em ki kaam pyrchah aiñ u ha kiwi ki jylla. 

Ini ym em kut i du heini, kini ki damok da phah Notice ki cha oo deiwa pyndur wa wan ko na CBI wa na u DCP (Deputy Commissioner of Police) wow pyntieñ chooh chooh ya ini u bru.

Da pteiñ chooh ki deiwa dawa wow phah u 85% ka poisa na ka Account yong oo cha ka Account wa em i pyrtuid “Melody Professional” ha ka IndusInd Bank wei nei tieñ uni u bru da phah u Rs. 2.62 lak cha kani ka Account lyngba ka RTGS wei mar dep ini da sangeh ki wow klam wa oo wei manda sñiawthooh u wa da chah thok u da ujor noh u ha Colaba Police Station, Mumbai.

Ini i jia pynkynmoo i leh ya kiwa boon kiwa chah thok kamjooh leh kiwi wow man kiwa syndong wei wow man kiwa husiar na kam kini ki damok kiwa Phone cha ki bru deiwa pyntieñ ya ki ha kiwa boon ki liang khamtam i em yusong tiar (Parcel), i jop khle nasib (Lottery) wa kiwi hei pyrtuid yong ki na ki bru wym tipmit. 

Related posts

Chah kem uwa kylliang ya u QR Code ka Petrol Pump yow lai ka poisa cha oo

November 11, 2024

Chah slaitbor ka khynnah wa dang 10 snem ha West Jaiñtia Hills, chah kem uwa emkti

November 10, 2024

Kammon wow lait na kam kini ki damok, ye leh u bood ya kini ki buit lada chem kam ini:

• Husiar lada poi Phone næ Message na kam kini na ki bru wym tipmit kiwa kam wa toh ki bru næ sahep na ka sorkar næ ki karkhana (Company) samen.
• Pyntikna yeiwa kam kini ki bru deiwa kylli bniah ya ki wa yatoh wa ki chnat sorkar næ karkhana wei wow lai leh ha ka Website kamjooh leh na ka Contact Information yow tip ya u Number Customer Care ki.
• Ham khana ya i pyrtuid yong phi khamtam hawa em kiwa kylli ya u Aadhaar, Bank Account Number, ki Password lyngba ka Phone lada kammon kammon leh.
• Syndong hawa em wa pyntieñ ya phi lyngba ka Phone iwa daw joor kat dang lai i por wei wow dam u yaklam wa kam kini ki bru.

Neiliang u Wyrta yooluti i wa deiwa pynmih yeini kiwa puræ daw syndong daw husiar ki wei kamjooh leh u pathai u khana ki ya kiwi hajrong ini neibhah kynmoo ki chnat sorkar næ ki karkhana ym Phone, ym Message næ e-Mail ki ya phi yow khana wa yoh poisa phi, næ wa poi tiar, wa chah khang (Block) ka Account phi wa kiwi de kam kini ki jait, ham Click leh ha ki Link wa poi deilang wa ki SMS.