U Chief Electoral Officer ka jylla, u Frederick R Kharkongor da khana u wa ka Election jied MLA 2023 toh kawa lai bait lai ryntih, tangwa da pyntip u leh wa ha ki sngi wa joor bha ka yalap Election nadooh wa da pynbna ya ka tarik Election, da yoh wow kem ya ki mar wa chongdor hadooh T. 74.18 klur wa kynthup yei drugs wa chongdor hadooh T. 33.25 klur.
Da khana u wa ha itai i yoh kem, T. 8.71 klur toh ka poisa, i kiad wa dapoi T. 6.62 klur i chondor, ki mar wa syad dor dapoi ki T. 91 lak wa kiwi ki kynja pynbiej bru wa chongdor T. 28.69 klur.
Hawa batai ya itai i yoh kem, u heh pulit ka jylla uwa man u Assistant State Nodal Officer ha kani ka Election, u Vivek Syiem da khana u wa i yoh kem ya kitai ki mar dih wa ki tiar wa da khang ha i por Election toh hadien wa ka chnat da paitbniah ko lyngba ki pulit kiwa da krehchitom waroh 24 kynta ha kani ka Election.
Hawa kylli, u Vivek da ong u wa ya katni i yoh kem ya u drug ym ye wow ong wa yatoh wa kiwon kiwon ki seiñ saiñ pyrthai ha kani ka Election neibhah hachwa yong ka Election leh ka chnat pulit da yoh ko wow kynreh chiboon i drug wa kynthup ya ki dawai kuli YABA.
Hawa kylli chooh chooh uni u heh pulit da khana u wa hadien wa da dep ya ka takit daw tip kiyi wa wanrah wei cheiwon mut ki wow pynpoi ya kini ki jait dih, da ong u leh wa em chiboon ngut kiwa da chah kem hajrong ini i kaam.
