Jowai: Ka seiñ All Jaiñtia Student Union (AJSU) seiñbei ynnin ka 21 tarik da pynman ko ya ka yalang pynsñiawthooh paidbah hajrong ka aiñ The Protection of Children from Sexual Offences Act (POCSO) 2012 kawa pynman ha Thomas Jones Synod College, Jowai.
Neiliang u PS Phawa, Working President ka AJSU da ong u wa kani toh ka sien wa ar wa pynman ya kam kani ka yalang heiwa nyngkong da pynman ha Khliehriat hajrong kajooh ka phang.
Ha kani ka sngi da em leh kiwi ki dkhot ki seiñbhalang kam ka JNC, JYF, HYC, EJNC wa ka JSU. Heiwa u President ka JNC u Andy Dkhar hei klam yong oo da ong u wa ki kynthai haap riam ki deiwa emakor yow lait u jia iwon iwon wa sniawsih ya ki.
Neiliang u Principal ka Thomas Jones College u Dr. RR Kharkongor da yaroh u ya ka seiñ wa pynman ya kam kani ka yalang yow pynchlur ya ki bru wow wan ki cha khmat wow ujor ya kiwa leh pyrchah ya ki.
Ha kani ka sngi u SP ka WJH u Vivek Syiem uwa man leh kam u kongsan ha kani ka sngi hei klam yong oo da ong u wa 30 snem nachwa ym jooh em wa klam chaphang ki kaam pyrchah ya ki kynthai wei katni katwa dang lai ki sngi dang roi i.
Da ong u wa ha u snem 2017 waroh ki kaam pyrchah ya ki kynthai da em ki 29 tylli ha WJH katwa ha uni u snem du hadooh uni u bnai da poi ki 47 tylli heiwa 29 tylli haap ki hapoh ka aiñ POCSO.
Da pyntip u wa katkam kani ka aiñ lada man ka kynthai hapoh 18 snem hanlada mynjur lang u chynrang waka kynthai da kheiñ bait toh da chah slaitbor ka kynthai wei kiwa yoh kurim waka kynthai wa dang hapoh 18 snem da kheiñ wa da slaitbor ya ka wei u chynrang da chah kem bait u.
Chooh chooh da ong u wa katni da chlur ki kynthai wow wan cha khmat wow ujor ya kiwa leh ya ki kaam pyrchah ya ki tangwa ka imlang sahlang leh haap kyrchaan ko ya ki kynthai wa maad ya kam kini ki jia wei ymhoi u kyntait ya ki.
Da sneiñ u leh ya ki kynthai wow man ki kiwa husiar hawa pynemkaam ya ki Social Media wei wow pyn yatohlok du wa ki bru wa tipmit neibhah i ya laike wa ki wym tipmit ye ko u yah cha kiwa boon ki kaam wa sih khamtam manda em ka kiad.
Ha kani ka sngi neiliang Women Police, Jowai da pynyoo ki ya ka phlim wa tbian heiyatoh wow yarap ya ki khynnah wa chah jrong kti wa kammon wow nood ki u wan cha khmat.
Ha kani ka sngi da yoh leh yei klam na ka W. Ksoo kawa man kam ka Legal Cum Probation Officer hapoh ka Social Welfare wa Child Protection Officer West Jaintia Hills District.
Discussion about this post