Kam u Dy Speaker wow neh ka sorkar MDA hadooh wa kut ka san snem

Shillong: U Deputy Speaker ka Meghalaya Legislative, u Timothy D Shira da ong u wa i yatylli yong waroh ki seiñ saiñ pyrthai wa synrop ha ka sorkar Meghalaya Democratic Alliance (MDA) wow pyrchah ya ka Congress daw pyntikna i wa kani ka sorkar MDA daw neh ko hadooh wa kut san snem.

Da ong u wa waroh ki seiñ wa synrop ha ka sorkar toh kiwa yookynchiñ ya ka Congress wei ini da pynkhlan chooh chooh ko yeini i yatylli yong waroh ki lok ka sorkar.

Chooh chooh da ong u wa ka sorkar synrop ha ki snem wa da lai ym jooh neh ki neibhah wa man ki ki wym skem deiwa e nongmuna ya ka sorkar synrop ha ki snem wa da lai kawa da yahkhmat da ka NCP kawa doh yei kyrchaan ki 31 ngut ki MLA.

Da ong u wa kani ka sorkar MDA wa yahkhmat da ka NPP yoh ko yei kyrchaan na ki 38 ngut ki MLA wei dang khlan ko neipor cheipor.

U Timothy da yaroh u ya u Montri Rangbah ka jylla, u Conrad K Sangma deiwa ong wa hapoh i yahkhmat yong oo dang boon chooh chooh ki MLA kiwa pynsñiaw yei thrang wow emlang ha kani ka sorkar wa katni.

Hawa jubab lada ka Congress em ko i thmu wow pynkhih ya kani ka sorkar, u Timothy da ong u wa waroh kiwa em ha ka liang pyrchah daw yaleh ki katwa ye wow pynhaap ya ka sorkar wei ini ym man i iwa phylla.

Related posts

Ya ka Election cha GHADC daw pynbna hadien ka Delimitation

April 15, 2026

Baam smai u Samrat Choudhary kam u CM wa thymme ka Bihar

April 15, 2026

Hajrong i rai yong u MLA ka Congress na Ranikor, u Martin M Danggo wow lai noh cha ka NPP, u Dy Speaker da ong u wa la kattu snem wa em u Dangngo ha ka sorkar Congress, tangwa ka Congress ym burom ko ya i dawa wow booh ya ka Ranikor Civil Sub Division.

Da ong u wa kani ka sorkar MDA wa katni yoo ko yeiwa emkaam ki paidbah ka Ranikor wow e noh ya ka khamtam kani ka thaiñ toh kawa dang sahdien bha.

Chooh chooh da ong u wa ki paidbah ka Ranikor khlem kheiñ ya ka party wow yakhun u, daw e ki yei kyrchaan ya u Danggo ha ka Election chiteiñ samoi lada ieh noh u ya ka kaam MLA kamwa da rai u.