Ka Meghalaya High Court hawa bichaar ya ka mukotduma wa da yaleh da ka High Court of Meghalaya Bar Association wa kiwi de pyrchah ya ka sorkar Meghalaya heiyatoh wa iwa jia ya u Lawyer ha Shillong uwa da chah pynbaad wa jrong kti wei leh khlem-akor u ya kawi ka kynthai heiwa da wan ki dkhot ka HNYF wow sai oo na thaw kreh u wei da pynlai paidbah oo.
Neiliang ki bor sorkar hawa e jubab da pyntip wa da kem ki ya 4 ngut ki dkhot ka HNYF deiwa pynngat ki hapoh ki Section 189(1)(c)(e)(2)/126(2)/115(2)/196(1)(c)/351(2)/356(2)/3(5) ka BNS.
Da pyntip leh wa uni u Lawyer da chah tba kti u ha ki dkhot ka HNYF heiwa da phah wow lai leh Medical Checkup u ha Shillong Medical College, Civil Hospital wei katkam ka Medical Report da ong wa da chah bok neiliang tidiang hei bynta i ngaap wei da tne leh neibynta i ktien hadooh wa da ad i ngaap wa i snieh ktien.
Uni u Lawyer da wiar yong bru u leh kamwa 5-10 minit.
Hadien ini da pynlai paidbah oo nadooh Keating Road hadooh wa poi ka Sadar Police Station.
Da chem leh wa ha pchem ka Sadar Police Station da em kiwa e khubor deiwa yaklam wa kiwa pathai khubor da ki bru paidbah, wei hadien wa jia ini neiliang u SP ka East Khasi Hills da pynkynmoo u yeiwa da em ka hukum yow khang wow yaklam wa kiwa pynmih khubor ha i thaw ki Police Station lait noh ki bor ka aiñ.
Neiliang ka Bar Council of Meghalaya da pyntip ko wa i yada yei man chngaaiñ ki muktiar kynthai toh iwa hakhmat dooh wei daw wanrah ko leh ya ki laad ki luti ki wow pynkrehkaam neibynta ini.
Ya kani ka mukotduma daw chong bichaar biang ha ka 19 tarik uni u bnai.
Discussion about this post