Jowai: Hadooh ynne ka janmiet da poi hadooh kamwa 1566 ngut ki bru na ri-loom Khasi wa Jaiñtia kiwa kwah wow kyntait wei wow pyndam yei pyrtuid yong ki na u Aadhaar wat hadooh kitæ kiwa da em Aadhaar Card na kiwa boon ki daw.
426 tylli ki chithi na ki bru samen (Individual Letter) da phah ha kani ka tayaw wa dadep lyngba ka Ordinary Post, 932 tylli nawon dap hah da ka Speed Post lyngba ki ar song wei daw phah sa 208 tylli mynstep lyngba ka Speed Post.
Neiliang yong ka Meghalaya People’s Committee on Aadhaar da ong ko wa dap ko dei mynsien wa sñiawkmen wei mynsien wei pynchlur ko leh ya kiwa da phah ya kini ki chithi wow pyndam pyrtuid na u Aadhaar cha ka Unique Identification Authority of India (UIDAI).
Da yooluti ko leh wa ka UIDAI daw pdiang wei daw leh ko yeiwa emkaam kamwa da kyrpaad ki bru samen wei katkam ka hukum ka Supreme Court.
Heijooh i por da e khublei leh cha ki volunteer wa em ha Shillong, Nongstoin wa Mawkyrwat wada pyllait por wa kordor ki neibynta wow yarap ya kiwa wan cha ka yungkrehkaam ka KSU ha kini ki chnong.
Heijooh i por da kyntu ko leh ya ki paidbah wymhoi u jhan u sya ki wow pynyabi ya u Aadhaar yong ki wa ki Bank Account, ki Mobile Number, wa kiwi kiwi wei wow yang ya ka hukum wa khaddooh ka yungbichaar wa khliehdooh ka ri ka Supreme Court hei yatoh wa ini.
Discussion about this post