theme-sticky-logo-alt
theme-logo-alt
Advertisement ad1

Snai-khop ki paidbah wa haap lai 15 Km u sarok na Muktapur cha Dawki

Advertisement ad1
Advertisement ad1

Jowai: Kawi na ki sarok wa da rim bha hapoh ka jylla wa jrong kamwa 15 km kawa pynyabi ya ka Muktapur ter ter chadooh Dawki, West Jaiñtia Hills District toh u sarok wa ki paidbah yachem ki yei eh i khoo neidaw wa da jæd da pai ware u wei ym em de u chna pynmiat ya oo da ki snem.

Uni u sarok toh u budloom ki paidbah yong ki palat 20 tylli ki chnong kiwa im ha ki kaam rep kwai wa pathi wei kiwa lai luti na uni u sarok wow khayi ya ki mar yong ki.

Advertisement ad1

Kiwa chong chnong kani ka thaiñ da pynsñiaw ki yei eh i khoo wa chem ki hawa lai lyngba uni u sarok khamtam heipor wa kit ki ya kiwa kjut wa chitom cha Dawki cha Nongtalang.

Da ong ki wa nei sih ware uni u sarok ka bai kari leh da kynjoh ko cha T. 1500 næ T. 2000 wow lai libooh ya kiwa kjut wa chitom.

U General Secretary ka CCIB, u Kmen Myrchiang da ong u wa ya uni u sarok dang pynemkaam hadooh katni weiwa ki Muster Roll dang  pyrchang ki wow chna pynmiat ya oo neipor cheipor tangwa ki bor wa pait nawon dei lyngkdang.

Da ong leh u wa uni u sarok toh u thiedsnaam yong ki paidbah ka thaiñ Riwar kiwa kit ya ki mar rep yong ki wow pyllai yaaw ha Dawki.

Heijooh i por da pynbaad u leh ya kiwa mihkhmat wa kheiñstiñ ki wei ym pait ym yoo de ki yei eh i khoo ki paidbah deiwa kyntu joor leh ya ki sahep wa em hei bor wow chimkhia ki yeini waroh.

Neiliang u president ka Synjuk ki Rangbah Shnong ka War-Jaiñtia, u Kolmen Pohshna da khana u wa neiliang ka Synjuk da thoh ko boonsien cha ki wa toh u pait yeini wow pynmiat ya uni u sarok tangwa ini waroh man i iwa sepia.

Share this:
Previous

Hadooh ynne 1,566 ngut kiwa kwah u pyndam pyrtuid na u Aadhaar

Next

Da wai ya ka dukan wa dai ya ki tiar paka ka Mahindra wa nyngkong dooh ha ri-loom Jaiñtia