U MDC ka Jowai Central, u Awhai Andrew Shullai ynne da pynbna u wa haka 10 tarik uni u bnai heipor 11:00 waje i step daw em ka yalang paidbah yong oo wa daw pynman ha madan Jrisaleiñ, Chutwakhu, Jowai.
Da pyntip u wa ha kani ka yalang daw pynskem yaka Block Committee ka TMC ha Jowai wei daw emlang leh ki MDC warim, wei ha katai ka sngi u man leh yow pynskem ya oo kam u kyrtong ka TMC na Jowai Constituency.
Heiyatoh wa i wan kyrchaan u CEM warim ka JHADC u Madonbai Rymbai ya oo, neiliang u Andrew da ong u wa kamwa da yoo hi wa waroh ki paidbah kwah ki yei kylla wei ym kwah ki yei em kam kani ka sorkar wa katni wei u Madonbai leh kwah u yeini hi i jooh yow wanrah yaka roi ka paar neibynta ki waroh ym toh ya ki kattu katni donhi ha ki kaam puræ puthi, i chait i khiah, ka rep ka riang wa kiwi kiwi.
Da ong u leh wa i daw wa psiah u cha ka TMC toh hadien wa da pyrkhat sani bha da 6-7 bnai, wei kam uwa jooh em ha ka Congress da ong u wa da mih ka kynrum kynram nadooh hapoh ka jylla wa kamjooh hapoh ka ri heiwa kiwa yahkhmat yong ka kiwa heh wa heh leh da yut ki kamjooh hapoh ka jylla wei wa em ki i daw ym toh wym ki daw wei i wan ka TMC da man ko kam ka rynsan wa thymme wei kawa pait ya kiwa kup chilliang sem chilliang wa ya kiwa khian paaid.
Da yaroh u leh yei mih ki dkhot ka TMC ha Delhi yow dawa tipmit yaka ktien Khasi wa Garo hapoh ka 8th Schedule kamjooh yow dawa pynkrehkaam ILP heiwa heini da chimbynta da ki MP na kiwi ki jylla.
Heiyatoh won kammon pdiang ki paidbah yaka Party TMC ha Jowai, da ong u wa ki paidbah ki tip hi ki, wei i kaam hi u batai deiwa e nongmuna wa ha West Bengal ym ye ka BJP ka ka TMC hanla leh ko katwa leh leh neidaw wa biang ki kaam wa kreh ka Party. Heijooh i por da ong u wa hawa dang sdang ym toh iwa suk ya ki bru wow pdiang nadooh ka Congress leh wei kamwa man hapoh Meghalaya ym em de da kawi ka Party wa ye u yieñ pyrchah yei thombor ka sorkar MDA.
U Andrew da pyntikna u wa yoh u leh yei kyrchaan u MLA warim ka Jowai, u Dr. R.C. Laloo wei i lai yong oo cha ka TMC leh toh deiwa chim rai da ki heh ka Congress.
Hawa kylli yeiwa pynbaad ki bru wa ki yakhih ki seiñbhlang wa i ya mih sarok ki paidbah toh iwa da e kyrchaan namo Sponsored ka TMC, da ong u wa em ki pynbaad ha ki kaam Politics tangwa i mih paidbah toh wa da chrai i mynsien ki paidbah nadooh wym yoh khih yoh khan ki bru iwa da ktah yow kpoh ki bru wei ka Party hi ym tharai ko wow leh ko kam kini ki kaam.
