December 6, 2022
Ka sorkar Meghalaya ynne da pynbna ko yaka hukum wow chna yaka Police Outpost wa thymme ha Barato, West Jaiñtia Hills District ka wow tip kam ka Barato Police Outpost. Yeini da pyntip da u Secretary ka sorkar Meghalaya, Home (Police) Department.
Ka Barato Police Outpost toh kawa em ka Saitsama OP cha khlieh, ka Jowai PS cha mihsngi, ka Raliang OP cha wah waka Nartiang PIC cha sep sngi.
Ki chong wow em hapoh kani ka Police Outpost toh ka Barato, Mukroh, Saba, Maitdien, Jongkynshur, Iongkwang, Thangrain, Khliehsniriang, Shiliangmyntang, Thadsning, Thad Ialong, Musiaw, Samatan, Moobandu, Latymphu, Thadbamon, Umsalang, Lummuriap, Sowkhlieh wa Bhain.
Deiwa chna ya kani ka Barato Police Outpost, ki thaw wa jooh em hapoh ka Nartiang Police Station u lai noh ko cha kani.
Puræ leh: Pynbna syndon ka sorkar ya 7 tylli ki Border Outpost hei lut wa T. 14 klur
