Uwi u khynnah skur uwa puræ Class-XII ha East Jaiñtia Hills District uwa tip kam u Heimon M Muksor, da khlam u hakhmat ki ar ngut ki MLA ka District kitæ u Kyrmen Shylla wa ka Santa Mary Shylla heipor wa wan pait ki ya u Marshall Biam uwa da chah thngan yow dawa wai mooyong noh.
U Heimon da ong u wa ki bei ki pa ki khynnah ym em poisa de ki neidaw wym em de wai ya u mooyong wei ini da pynman ya ki wym em poisa de ki wot wow phah lai skur heiwa tang ka bai chong kari leh ym em de wei neini chakhmat ye u man wa daw hap dam skur namo wow Dropout noh.
Da ong u wa lada khang ya kiwa dang hapoh 18 snem u kreh ki deiwa phah lai skur, kammon u leh hawa ki bei ki pa ym yoh khih ki neidaw wa khang ya u mooyong, wei ini da pynbor ko leh ya kiwa boon wow lai cha baar yow thooh kreh.
Da kyntu u ya kiwa mihkhmat khamtam ya u Chief Minister wow leh u yeiwa toh u leh u neibhah manda hap ki khynnah u dam skur daw poi cha ki kaam dih drugs, i kaam tooh wa ki kaam wym man.
Da ong u wa lada lai skur tangwa ym yoh khih leh ym phær tang wa yoh i stat wa i chemphang.
Da yooluti u leh wa ini i yakhih deiwa em i yaichah daw poi i chei jop.
Discussion about this post