Ka Regina Lamo kawi na ki Actress wa bna naam ka jylla kawa da embynta u ak ha ki phlim Khasi wa phlim Pnar, haka sngi wa wan sakhi lang yei sdang pynyoo paidbah yaka phlim “Skap: The Brother of Skop” ha CTC Orchid Inn Thadlaskeiñ heiwa ka leh man ko kam kawai na ki Actress ha kani ka phlim, booh ko i kyntu kyrsu yaki paidbah wow e ki i kyrchaan deiwa khooid mynsien wym wow kdaw wow boh ware du yei duna neibhah dei manbru, em bait i bakla wei ym biang lut hi waroh.
Ong ko leh wa neipor cheipor katkam wa yah ka juk da nang yaleh u pynphær u pynpliah hei rukom waphær, wei wot ki phlim Bollywood leh yoo beit i yei yaphær heiwa nachwa kammon katni won kammon nadooh i riam, i rukom ak wa kiwi deiwa yaleh u nang ku neipor cheipor.
“I boh nia ym wanrah myntoi i tangwa toh u e mynsien khnang wa ki khon khynroo khyllood wa em sap kiwa kwah u lai chakhmat leh yow ye ki u yoh ka laad kamai bar u ngat ki hei kaam wa sih,” da ong ka Regina Lamo deiwa pynrap wa deiwa boh yeiwa khian wa nai ympoi cheiwon cheiwon.
Neitæ kyrpaad ko leh yaki paidbah wym hoi u thoh u klam deiwa ktah yei im wei man samen u bru næ ka bru neibhah ini toh iwa pynsñiawsih bha ya waroh kiwa ak phlim heithaw wow e mynsien ya ki kamjooh ya kiwi kiwa kwah wow sdang ya kani ka kaam.
Pynrap ko wa hei sakhiat hi kam ki Artist hap ki u bood, u leh katkam wa emkaam ka Script næ Scene nadooh ka riam ka bait khnang wa kiwa pait leh u hun ki yeiyi wa ak ki neibha ini toh i khih ki.
Discussion about this post