15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Ham klam chaphang ka J&K; boon wa hap phi u jubab bar yeiwa ye phi u kylli: ong u Shah yaka Congress

0 Comments
Advertisement ad1

Jowai: U BJP President uwa man leh kam u Union Home Minister u Amit Shah ynne ka sngi da khyrwait u yaka Congress hapoh ka Lok Sabha hadien wa kylli ki yei paan u lat ka jylla Jammu & Kashmir yow pteiñ yaka President Rule sa 6 bnai hapoh kani ka jylla.

U Shah ynne ka sngi da wanrah u leh yaka Bill J&K Reservation Amendment Bill deilang wow tyrwa yaka rai wow pteiñ chooh yaka President Rule ha Jammu & Kashmir.

“Iyi i daw wa em ym khang (Banned) yaka Jamaat-e-islami nachwa yeiyi kwah phi u pynhun?” da kylli u Shah yaka Congress deiwa ong wa i man ka J&K katni ym toh iwa chna ka sorkar NDA.

“Ki sorkar wa nachwa da yada ki ya kiwon kiwa klam pyrchah yaka ri India, wei ka sorkar NDA da pyndooh ko ya ini i yada ya 919 ki jait bru wa kam kini”.

Hawa jubab yeiwa kylli u MP Congress u Manish Tewari, uwa da klam ya i parom wa mih ki seiñ keiñ suloi ha J&K deiwa pychah leh yaka rai ka sorkar, u Amit Shah da ong u wa ka Congress hap ko wow jubab chiboon bar yeiwa ye ko u kylli.

“Ya ki Election wa pynman ha ki snem 1957, 1962 wa 1967 toh kiwa ym em khooid wei da man ki wa thung symbe wym chaniah yaka synchaar paidbah,” da ong u Shah hawa jubab ya u Tewari.

“Ka BJP ym em pynyaap ko yaka synchaar paidbah; ka Party yong i ym em ko tang u em leh ha kitu ki por. Ki Election kiwa yong sakhiat ha Kashmir da pynman du hapoh u ka sorkar u Morarji Desai wa hadien ka sorkar u Atal Bihari Vajpayee.” Da ong u Shah.

Da ong chooh chooh u wa ka sorkar Congress da pynemkaam ko yaka Article 356, 93 sien na ki 132 sien wei ka Congress ym em hok ko wow batai ya kiwi.

U Shah da ong u leh wa kani ka jylla da sdang ko wow suk nadooh wa em kani ka sorkar kawa katni bar ya kiwi ki sorkar, “Nachwa tang wow pynhær yaka lama ka ri leh man ko kawa eh bha chwa wow lai u PM Modi cha Lal Chowk.”

Da kam u leh wa ka sorkar NDA lyngba ki Welfare Schemes wa kiwi ki kaam da pynbha pynmiat ko ya rukom im kiwa sah ha J&K.

Da e nongmuna wa da ye u pynman yaki Election Panchayat wa Lok Saba kiwa lai bait khlem iwon i joo i snam.

“Hadooh 82% ka yarap poisa ka sorkar kawa da pynbna ko kawa T. 80,000 klur da u Prime Minister ha u snem 2015 da ye wow pynemkaam ka wei 16 tylli ki Project da ye wow pyndep lut yaki.”

Heijooh i por u Home Minister da ong u wa ka sorkar pyrdi ym em pyrchah ko ya kitu kiwa kwah wow tympiah yaka ri.

“Toh du neidaw ka sorkar u Narendra Modi pynemkaam ko yaka Zero Tolerance Policy wa ka ri India ye ko wow yaleh pyrchah yaki seiñ keiñ suloi yow tip ki u tieñ yaka ri wa man ki kam kiwa choon yaka ri”, da ong u Shah iwa pynyoo waka sorkar hi ym e laad ko ya kiwa pyrchah yaka ri.

U MP ka Congress u Adhir Ranjan Chowdhury hawa e won u yei klam pynkut da ong u wa i boon ki chipai ka ri India ha kani ka jylla pynyoo yei thmu sakhiat kani ka sorkar bar yei klam yong ka.

Also Read: Sa 6 bnai u pteiñ ka President’s Rule ha Jammu & Kashmir

Share this:
Previous

Tyrwa ka NITI Aayog wow pynkylla ya waroh ki thuk thuk wa hapoh 150 cc cha kiwa pynemkaam da i bordin ha u snem 2025

Next

Pynthymme wa kitkaam ka Dorbar Chnong pyllun ka Pynthorsale