15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Ham pynsariem yaka ILP waka Sixth Schedule: HANM

Advertisement ad1

Shillong: U President ka Hynniewtrep Achik National Movement (HANM), u Lamphrang Kharbani da pyntip u wa ha u snem wa da dep, u Montri Kaam Pohyung ka ri India, u Amit Shah da ong u ileh wa kwah ya ka ILP hawa da em ka Sixth Schedule.

Da klam che u wa u wa ka sorkar ym toh u pynsariem ko ya ka ILP wa ka Sixth Schedule, neibhah ka Sixth Schedule næ ki Autonomous District Council toh neibynta wow yada ya ka riti ka dustur yong ka jaitbru wei ka Land Transfer Act toh neibynta wow yada yei mantre ya i khyndaw i chyiap, katwa ka Inner Line Permit toh neibynta wow yada nei chah tlep ka jaitbru ha kiwa na baar.

Katkam wa pyntip u Kharbani, i klam u Amit Shah da paw che wa lada e ya ka ILP ha Meghalaya, hap wow pyndooh noh ya ka Sixth Schedule.

Da ong u wa ka jaitbru emkaam jhan ko ya ka ILP neibhah ki bru kiwa na baar da baam lut ki ya ka kamai kajih, wei i maa wa yang toh wa ki baar jylla daw yoh ki wow baam syndon ya ka kaam chna aiñ, deiwa ong wa ym toh wow ap yei e daw ka sorkar India wa ka Citizenship Amedment Act (CAA) ym krehkaam ko ha ki Schedule Area.

Da pyntip u leh wa da lai i khana na kiwa yahkhmat ka BJP ha ka thaaiñ North East wa ka Meghalaya daw yoh ko ya ka ILP ha u snem 2022, deiwa ong wa ini ye u man i thmu wow pyndait thah næ pyn jai jai ya ka yakhih ILP ha kani ka jylla, wei ye leh wow man wa ka BJP ym pyrwa ko yei eh ki paidbah ka thaaiñ deiwa pynman Politics ya kani ka kaam yow yoh naam ha chwa ka Election 2023 ha kani ka jylla.

U Kharbani da kyntu u ya kiwa mihkhmat wow pynsñiawthooh cha ka sorkar India wym toh u ya pynsariem ya ka Sixth Schedule wa ya ka ILP, neibhah ka jylla ka emhok ko wow yoh ya ka ILP wei kamjooh wow pynkhlan ya ka Sixth Schedule.

Share this:
Previous

Ym pu em yoh yaka tulop kiwa sikai SSA, yooluti wa daw yoh chwa ka Christmas: Lahkmen

Next

Pynlait ka sorkar pyrdi T. 6000 klur cha ki jylla yow pyndap ya iwa duna wa yoh naka GST