Ka Joint Action Committee on Border Issue kawa kynthup ya ka JSU, KSU, JNC, JSM, FKJGP, ka Dorbar Chnong Lapangap wa ka Synjuk Waheh Chnong Ri Jaiñtia ynne ka sngi da yachem ko ya u Chief Minister ka jylla u Conrad Sangma heiyatoh wa i man i long ha khappood wa ka Assam khamtam ha Lapangap.
Heiyatoh wa i awri ha Lapangap wei i chah pynthut ki paidbah ha katai ka chnong, ka Committee da kyntu ko wow pynboon ya ki pulit ha ka thaaiñ khamtam heipor wa ah kba ki yow yoh ki paidbah ka chnong u ah deiwa suk.
Da kyntu wow pynjoor yei uiñ Patrolling ki pulit khnang wow lait nei psiah tooh wei pynawri kiwi ki bru na baar jylla kamjooh yow pynboon leh yei em ki pulit khamtam ha kini ki por ah kba.
Da dawa leh wow e ya ki tiar kiwa biang ym du ki lathi ha ki pulit deiwa pynbiang leh ki tiar yasiat, ki kari wa kiwi kiwi ki wow ye ki pulit u pynemkaam ha khappood.
Chooh chooh da ong wa deiwa em boon ki pulit daw wanrah i yei chngaaiñ wei daw lait ki paidbah u chim ya ka aiñ ha kti wei wow lait u heh i awri.
Heiyatoh won wei pynkrehkaam ya ka Section 163 ka BNSS, da paan pynche wa hadooh katwon u pynkrehkaam ya kani ka kyndon wei hanla krehkaam ko ymtoh won u thut i lai i wan ki tre chnong neibhah wa da slem i por ya ki wow ah ya u kba.
Ka Committee da ong ko leh wa lada ymye ka sorkar wow yada ya ki paidbah khmatam ha i por ah kba, ka sorkar u man ko kawa bahkhlieh neibhah i kreh chitom ki paidbah waroh chi snem chong i hei wow ye u ah ya u kba heini i por donhi wei lada chah leh pynsih u kba man ko du neidaw wym ye ka sorkar wow e yada.
Heijooh i por ka JAC da kyrpaad ko ya ka sorkar wow e ya ka bai lutsan wei wow bahkhlieh kamjooh wow su ya ka poisa yong ki mar rep hawa dooh ki paidbah ya u kba yong ki wei wow pynbiang ya ki mar baam cha ki manyung wa chah ktah ki mar rep.
Discussion about this post