U Dr. Mukul Sangma uwa man leh kam uwa yahkhmat ka liang pyrchah da kylli u wa lada ym toh wa da em i pynbait chwa ya iwa jia ya u Cheristerfield Thangkhiew wei ileh wym e chwa cha ki paidbah ya kani ka bui (Report) wei katkam wa chem da ka takit ka Commission of Inquiry kattu toh i kaamram ka sorkar wow leh yeiwa emkaam tangwa ha kani ka kynti ym em leh iwa da wanrah yei dooh yei hok wa i chaniah ki paidbah ya ka sorkar wa ki bor sorkar.
Da ong u leh wa kani ka Report da kdaw ko wa em i leh yabor wa iwa khlem pyrkhat da ki pulit.
Heijooh i por da ong u wa ki pulit ka Meghalaya da dep maad ki iwa khor bar yeini yow wanrah biang yei suk i saaiñ hapoh ka jylla hadien wa mih ki seiñ kieñ suloi wei da lai kynreh ki da boon tylli ha ki snem wa da dep wei ini wa jia ym toh nei tlot lane wym biang i rukom krehkaam ki pulit.
Da ong u wa manda tip deiwa tikna toh u leh heitæ i rukom wa biang yow lait i chah ktah kiwi kiwa hayung hasem kamjooh kiwa sah cha jan wei kamjooh leh toh u kær kut yei yung heiwa ha kani ka Report da ong wa dadep leh yeini wei toh wow yang hadooh wa che wei ileh ym yang sa du ar kynta wei ileh ym em bood ya ki kyndon namo ki Standard Operating Procedure.
U Mukul da kylli u leh wa lada katkam ka aiñ ini ym toh mo ka Criminal Conspiracy kawa da leh da kiwa em ha ka aiñ ya ki kaam wa pyrchah aiñ wei ka sorkar toh u jubab ko yeini. Wei toh u pait ya kawi pa kawi ka aiñ yow pynyoo wa da leh katkam ka aiñ yow yoh biang yei chaniah ki paidbah.
Da pynchlur u leh ya ki paidbah wow kylli hajrong ini waroh neibhah ki pulit toh kiwa da dep sikai wei da dep leh ya kam ini i jait da boonsien nachwa tangwa ileh won heini i por dapoi chei yap deiwa kylli chooh chooh wa kwah ki wow kem namo wow pynyap ya u Cheristerfield Thangkhiew.
