Ka Meghalaya Football Association (MFA), ynnin da chong pynman ko ya ka yachemlang namo ka General Meeting deiwa emlang ki District Association na kylleiñ ka jylla wa da chimbynta.
Ha kani ka yalang da chim ya ki kattu katni ki rai yow pynklan yei rukom pynman ya ki lympung yalehbol ha Meghalaya deiwa emlang u MFA President, u Hamletson Dohling, u General Secretary, u Sunesh Syiem wa kiwi kiwa ksoh kaam ka seiñ deilang ki dkhot ki District Association.
Kawi na ki rai toh yow booh kyndon yei pynman Football Tournament da ki seiñ ki bru samen, ki Sports Club wa kiwi deiwa bood noh ya ki kyndon wa da pynmih da ka All India Football Federation, heiwa neini chakhmat kiwon kiwon kiwa pynman Tournament hap ki wow yoh bor na jar jiar ki District Sports Association wa da tipmit da ka MFA.
Ini man ko khamtam ya kitu ki Tournament wa wan chimbynta da ki Professional Football Player kiwa da em pyrtuid hapoh ka Centralised Registration System (CRS) ka AIFF wei kamjooh ki Referee wa da tipmit.
Ka MFA da ong ko wa deiwa leh kamni daw pyntikna wa ki lympung yalehbol wa pynman hapoh waroh kawi ka jylla da leh ki katkam ki kyndon wa da booh, wei yeini i rai da kyrchaan da waroh ki District Association.
Ha kani ka yalang da pynlait ya ka Financial Report ka MFA wa kiwi ki Report yong ki kaam wa da leh ha u snem wa da lai wei da pynlait leh ya ka Calendar yong ki yalehke wa daw pynman.
Discussion about this post