Heiyatoh wa i sangeh kit jhep ka Jowai Municipal Board ha Jowai la kamwa ar tayaw kattu neidaw wa pyrchah ki 7 Chnong deilang waka KSU War Jaiñtia wow li noh hei thaw yong ka District Council wa em hajan ka wah Myngkjai. Kamtæ ynne ka sngi neiliang ka Seiñraij Jowai, deilang wa ki bor pynlai ka Dorbar Chnong Tympang Iawmusiang da mih ki chakhmat neibhah wa ki jhep da neh wei sma tung ki haki yung ki sem ki yaw ki haat, deiwa booh kylli yaki bor District kamjooh ka chnat wa toh u pait wa hadooh katwon sang ka KSU toh kawa hakhlieh dooh yong ka District kawa ye u khang yei lai noh jhep ha katai ka thaw kawa da pynemkaam da ki boon snem, hawa kamni cheiwon u li noh kattu.
U President ka Seiñraij Jowai u OR Challam ong u wa lada ha kani ka yurim hap wow pyrkhat da kawi won ka luti ya kini ki 7 Chnong neibhah wa ki leh toh kiwa wanrah jhep hi cha Jowai lyngba ki mar ki mata yong ki.
Iwa pynsñiawsih pynpyrkhat ya kini kiwa yahkhmat toh wa ki thaw wa jooh lang ki jhep haka yaw ka District Council wa ha Laad Wah Nangbah, hawa sangeh pynlang jhep ka Municipal ha kini ki 15-16 sngi, ym em de yoo yei jhep ha kini ki thaw, yoosar ki bru da lai noh ki cha ki soodong sookun ka rymaw kam chajan Thomas Jones College, cha ki khloo wa kiwi ki thaw wa ha kini ki por boon ki bru wa em kari.
Pynsñiaw haroh u i yamrem wow yoo wa sa katwon ka jylla da kynjoh dap 50 snem ko, tangwa wym pu sñiaw wa neiliang ka sorkar wow leh ko ya kate ka Solid Waste Management haka District katkam ka juk thymme khnang yow lait neini i eh i khoo.
“Mynchwa tip i wa ka chnong Jowai toh ka yitpait yong ka District tangwa katni won yoosar da man ka chong ka wow kyrtem da ki bru wa na ki thaiñ nongkyndong,” ong u OR Challam.
Chooh chooh u OR Challam ong u wa neiliang ka sorkar jylla, sorkar bei da wanrah ko yaki Policy hajrong i khooid i pliah tangwa da lai ki por ki sngi nadooh u snem 2014 ka sorkar India da pynchlur ko wow pynkhooid yaki soodong sookun, da sikai ko ymtoh de u pynemkaam Plastic. Katwa ki bru da sdang sñiawthooh ki yei leh khooid hantæ da wan noh da ini i eh haka District.
Neiliang u Waheh Chnong ka Tympang Iawmusiang u E. Shylla, ong u wa Iada ka bor District ym bien ko u chimkhia wym tip iyi i maa wa yang ya i, neibhah haki snem wa dep tyngkhooh i yei kjut COVID-19 tangwa kattæ won dei sma dei tung.
Ong u wa hei sakhiat hawa mut khang ya kawon kawon toh u e por chwa yaki bor wa toh u pait. Chooh chooh da ong u wa lada i leh khang syndet i wow wan khayi pateiñ ki kammon u sñiaw ki.
Heijooh i por kyntu u yaki bor District lyngba u Deputy Commissioner WJH wow chimkhia ki heiyatoh wa kani ka kaam neibynta i eh i khoo wa i chait i khiah ki paidbah ka Jowai.
