March 29, 2021
Advertisement
Ynne ka sngi da em i jia wa sñiawsih ha Lumpyrtuh Mihmyntdu, West Jaiñtia Hills heiwa ki 5 ngut da khlaad ki wei da pynlait-im won 2 ngut heipor wa pynkhooid ki ya kawi ka thlu-um ha iwi i yung wa dang chna kawa yillu kamwa 30-35 phut wei i thaw psiah wa heh du 3×3 Sq/ft.
Ini waroh da jia i heipor kamwa 2:30 heiwa da hiar 7 ngut uwi hadien uwi hapoh kani ka thlu-um ha ini i thaw wei manda poi hapoh da sdang pynkrehkaam ya kawi ka kor wei mar heitæ da sdang dooh la’ær hapoh ini i thlu wei da sdang ki wow yap-op.
Da suba wa da sdang dooh la’ær ki toh neidaw wa pynkrehkaam ki ya ka kor (Water Pump) wow sai ya ka um wei i thlu wa lait la’ær iwa da pynemkaam wow ngam chapoh ini i thlu da man i iwa khian wei kamtæ da duna noh ka la’ær ha ini i thlu.
Na kini ki 5 ngut kynthup ki ya u tre yung wei boon na ki toh kiwa na chnong Raliang, West Jaiñtia Hills wei da wan ki cha Mihmyntdu wow kreh ha ini i yung.
Heipor wa wan ki pulit ka Fire and Emergency Service mar poi ki ha ini i thaw ki leh ymlait ki wow psiah neidaw ka la’ær da man bih ko wei kani ka kor dang krehkaam (Running) hi ko kawa em hapoh, wei hadien wa yoh u sai ya ki, uwi na ki 5 ngut kiwa da khlaad dang im u tangwa da khlaad noh u heipor wa kit ya oo cha thaw sumaar.
Ki 2 ngut kiwa mynsoo katni dang em ki hapyrdi i chah sumaar ha Jowai Civil Hospital, Ialong.
Kiwa khlaad toh u Hamklet Suchiang (36 snem) uwa man leh kam u DFO, Shillong HQ., u Bunlad Suchiang (29 snem) chi payu wa u Hamklet, u Niwan Suchiang (50 snem), u Phima Dkhar (19 snem) wa u Dannyboi Iano (23 snem) kiwa waroh na Raliang.
Kiwa lait im toh u Minotlang Khyriam (34 snem) wa u Deiwa Lyngdoh (18 snem) kiwa na Raliang.
