Ynne ka sngi da mih i yaklam wa yillu hajrong ka mynried ka Dawki PHC hadien wa mih i thmu wow sliah ya ka neidaw wow pynkrai wei wow chna pynmiat ya u sarok na Shillong cha Dawki, West Jaiñtia Hills khnang wow man u kam u Two Lane hapoh ka Scheme JIPAC.
Neiliang kiwa pait ya kani ka thaw sumaar (Dawki PHC) kamjooh leh ki bor chnong da artatien ki wa ya hap sliah noh ya kani ka thaw sumaar (PHC) du neidaw wow chna pynmiat noh ya uni u sarok.
Katkam wa man kattæ hi, ka sorkar da kwah ko wow pynmiat wei wow pynkrai ko ya u sarok wow man u kam u ‘Two Lane’ nadooh na Shillong hadooh ha Dawki wei uni u sarok ye u wow lai lyngba kani ka thaw sumaar hadien wa sliah noh ya ka (Dawki PHC).
Neiliang ka sorkar da thmu ko wow chna pynmiat ya u sarok na Shillong chadooh Dawki wow man u kam u Two Lane hapoh ka Scheme “JIPAC”.
Neiliang u Hek da ong u wa katkam ka sorjamin (Survey) wa nyngkong kani ka thaw sumaar (Dawki PHC) da lait ko tangwa ha ka sorjamin wa ar nawon da chem wa daw lai luti ko lyngba yong ka wei daw hap sliah lut ya ka, wei ini daw booh i hei eh i khoo ym du ya ka sorkar tangwa wot ya ki paidbah leh kamjooh neibhah ha kani ka juk wa katni emkaam i pynar chirup u sarok wa i chait i khiah.
Kam u MLA ka thaaiñ, u Lahkmen Rymbui da kyntu u ya ki paidbah wow man ki kiwa yaichah neibhah lada em i thaw wa ye u su salan namo wow kyrriah ya kani kani ka thaw (PHC) hanlada jngai ko 2-3 KM leh emkaam wow pdiang ya ka.
Neiliang u Rymbui da kular u leh wow pyntikna ya ka luti wow lai uni u sarok wa thymme hapoh 10 sngi khnang wow ye u wanrah wei wow pynjanai yei rukom krehkaam ka Dawki PHC.
Hajrong ini waroh, neiliang u Hek da ktyntu u ya ki paidbah ka thaaiñ wow man ki kiwa yaichah neibhah neiliang ka sorkar u pynbiang ko yeiwa emkaam kani ka thaw sumaar wei daw pyrkhat ko leh kammon u leh lada haap kyrriah noh ya ka cha iwi i thaw.
