Ynnin ka sngi ki pulit ka East Jaiñtia Hills hadien wa yoh ki ya ka yutip wa tikna, da sdang ki yei kreh nadooh 6:00 waje i janmiet wei heipor kamwa 7:00 i miet da ksoh ki ya kawi ka kari Bolero rong lieh kawa em ya u Number na Assam ha Kongong, kawa haap hapoh Ladrymbai Out Post.
Manda kynreh ya kani ka kari da chem 10 tylli ki synduk (Carton) wa em hadooh 2,000 tylli ki diñdamait (Gelatine Sticks) kiwa khia hadooh 250 Kilo wa 1,000 ki Live Detonators.
Neiliang ki heh pulit wa kynthup ya u DSP (Headquarters), DSP (Crime) wa kiwi ki sahep pulit da kem ki ya ar ngut ki bru napoh kani ka kari wei manda takit ya ki da yoh u kem sa ya 4 ngut na Umpleng, Mokympad wa Sankilo ya kiwa da suba wa emkti ki wow dai ya kini ki tiar cha ki ar ngut ki bru (kiwa da kem napoh ka Bolero).
Hadien wa chah kem kini, da yah ki ya ki pulit Khliehriat PS cha Sankilo ha i thaw wa da thap ya kini ki diñdamite ha ka Bolero wei na ini i thaw da chem sa hadooh 51 tylli ki synduk wa em kamwa 10,200 tylli ki diñdamait (Gelatine Sticks) kiwa khia hadooh 1275 kilo chirup wa 5000 tylli ki Live Denators wa 8 Roll ki Cordtex (Fuse).
Ha ini i kreh ki pulit iwa neh du hapoh 12 kynta (nadooh ynnin i janmiet ka 2 tarik hadooh ynne i step 7:00 waje ka 3 tarik) da chem hadooh 1,525 kilo ki tiar tympdung wei da kem leh hadooh 6 ngut ki bru.
Da takit leh wow chem lada ini i yoh ki pulit em yatoh i namo ym em wa i pdung bom ha Sookilo neibhah ki tiar toh kiwa sariem wa kiwa pynemkaam ha Sookilo.
Heiyatoh wa ini da Register ya ka Case hapoh ka Explosives Act wa kiwi ki kyndon ka aiñ wei i takit hajrong ini dang lai i chaphrang.
